សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ជនសង្ស័យម្នាក់ ពុំដឹងជាមានរឿងហេតុអ្វី ស្រាប់តែយកដុំថ្មគុបកញ្ចក់រថយន្តរបស់គេ ដែលចតលើចិញ្ចើមផ្លូវ បណ្ដាលឲ្យកញ្ចក់រថយន្តមួយផ្ទាំងមុខខូចខាតទាំងស្រុង ។ ករណីខាងលើនេះ បានកើតឡើងវេលាម៉ោង១៨និង៣០នាទី ថ្ងៃទី២៧ ខែមិថុនា ឆ្នាំ២០១៩ ស្ថិតក្នុងភូមិខ្ពបលើ ឃុំខ្ពប ស្រុកស្អាង ខេត្តកណ្តាល។
មន្ត្រីនគរបាលស្រុកស្អាងបានឲ្យដឹងថា ឈ្មោះ តន សំអាត ភេទប្រុស អាយុ២៩ឆ្នាំ ជនជាតិខ្មែរ នៅភូមិវាលត្រែង ឃុំតាលន់ ស្រុកស្អាង ខេត្តកណ្តាល ។ ចំណែកជនរងគ្រោះ ឈ្មោះ និយម សុវណ្ណ ភេទស្រី អាយុ៣៨ឆ្នាំ មុខរបរ សំអាងការ ជនជាតិខ្មែរ មានទីនៅភូមិខ្ពបលើ ឃុំខ្ពប ស្រុកស្អាង ខេត្តកណ្តាល។ ដោយឡែកវត្ថុតាងដកហូបានមាន៖ ដុំថ្មចំនួន១ដុំ ។
ប្រភពដដែលបន្តថា នៅថ្ងៃទី២៧ ខែមិថុនា ឆ្នាំ២០១៩ វេលាម៉ោងកើតហេតុខាងលើ ជនសង្ស័យឈ្មោះ តន សំអាត បានឆ្លងទូកដ មកពីត្រើយខាងលិច ហើយដើរតាមផ្លូវ ។ លុះដើរមកដល់ចំណុចមុខផ្ទះរបស់ជនរងគ្រោះឈ្មោះម៉ិញ សុវណ្ណ ក៏បានយកដុំថ្ម មកគុបបំបែកកញ្ចក់រថយន្តម៉ាកព្រូស ពាក់ស្លាកលេខ ភ្នំពេញ2AK-9634 ដែលចតនៅចិញ្ចើមផ្លូវក្បែរផ្ទះ បណ្តាលឲ្យបែកកញ្ចក់ផ្នែកខាងមុខទាំងស្រុង។
បន្ទាប់ពីសមត្ថកិច្ច ទទួលបានករណីខាងលើ ភ្លាមនោះ ក៏ចុះដល់កន្លែងកើតហេតុ រួចឃាត់ខ្លួនជនសង្ស័យ យកមកប៉ុស្តិ៍ដើម្បីចាត់ការតាមច្បាប់ ៕ ស្អាងជ័យ
