សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានរងរបួសបាក់ភ្លៅ និង២នាក់ទៀតរងរបួសរលាត់ដៃរលាត់ជើង ខណៈបើកម៉តូដឹកគ្នាយ៉ាងលឿន ជ្រុលទៅបុកក្បាលព្រួញពុះចែកទ្រូងផ្លូវ ។ ហេតុការណ៍នេះបានកើតឡើងនៅម៉ោង១០និង២០នាទីយប់ ថ្ងៃទី២៣ ខែកក្កដា ឆ្នាំ២០១៩ នៅតាមបណ្ដោយផ្លូវលេខ២៨៩ ក្នុងសង្កាត់បឹងកក់ទី១ ខណ្ឌទួលគោក ។
ប្រភពព័ត៌មាននៅកន្លែងកើតហេតុ បានឲ្យដឹងថា នៅមុនពេលកើតហេតុគេឃើញបុរសបីនាក់ បើកម៉ូតូមួយគ្រឿង ម៉ាកហុងដាភីស៊ីអ៊ិច ពណ៌ស ពាក់ស្លាកលេខ ភ្នំពេញ1CX-5502 ដឹកគ្នា តាមបណ្ដោយផ្លូវលេខ២៨៩ ក្នុងទិសដៅពីជើងទៅត្បូង យ៉ាងលឿន ។
ខណៈមកដល់ចំណុចកើតហេតុម៉ូតូ បានជ្រុលទៅបុកនឹងក្បាលព្រួញពុះចែកទ្រូងផ្លូវ ពេញទំហឹង បណ្ដាលឲ្យបុរសម្នាក់រងរបួសបាក់ភ្លៅ ត្រូវបានរថយន្តសង្គ្រោះបន្ទាន់ ដឹកយកទៅសង្គ្រោះនៅគ្លីនិកឯកជនសម្ភពរស្មី ចំណែកពីរនាក់ទៀត បានរងរបួសរលាត់ដៃរលាត់ជើង ។ ភ្លាមៗនោះបុរសម្នាក់ ជាអ្នកបើកបរម៉ូតូ ដែលរងបួសស្រាល បានលើកម៉ូតូរួចជិះចេញពីកន្លែងកើតហេតុ ចោលគ្នីគ្នាពីរនាក់ទៀត ។ ប៉ុន្តែស្របពេលក៏កម្លាំងសមត្ថកិច្ច ចុះមកកន្លែងកើតហេតុទាន់ ក៏ជិះដេញតាមស្ទាក់ចាប់បានមកវិញ ដោយមានការសង្ស័យសមត្ថកិច្ច ក៏បានឆែកឆេរទៅលើខ្លួនបុរសទាំងពីរ តែពុំឃើញមានអ្វី ដែលពាក់ពន្ធ័និងបទល្មើសខុសច្បាប់នោះទេ ។
បើតាមសម្តីពីបុរសម្នាក់ ដែលជិះម៉ូតូចេញពីកន្លែងកើតហេតុ បានឆ្លើយប្រាប់សមត្ថកិច្ចថា មកពីរូបគេប្រញាប់ទៅយកលុយពីបងប្អូន នៅឯផ្សារថ្មី ទើបបានគេលើកម៉ូតូ ជិះទៅម្នាក់ឯងចោលគ្នីគ្នាតែម្តងទៅ ។
បន្ទាប់ពីកើតហេតុសមត្ថកិច្ចមូលដ្ឋាន បានយកម៉ូតូទៅរក្សាទុក នៅប៉ុស្តិ៍នគរបាលរដ្ឋបាល បឹងកក់ទី១ ដើម្បីរង់ចាំម្ចាស់យកឯកសារ ដែលពាក់ព័ន្ធនឹងម៉ូតូមកផ្ទៀងផ្ទាត់ យកម៉ូតូត្រលប់ទៅវិញ ៕ ជ្រោយពេជ្រ
