សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ស្រ្ដីម្នាក់ ជិះម៉ូតូដេញតាមរថយន្ដយកកាតធ្វើការឲ្យប្ដី ដោយមិនបានប្រុងប្រយ័ត្ន ជ្រុលទៅប៉ះដៃចង្កូតជាមួយរថយន្ដដួលទៅលើផ្លូវ ត្រូវរថយន្ដកិនបន្ថែម បណ្ដាលឲ្យស្លាប់យ៉ាងអាណោចអាធ័ម កាលពីវេលាម៉ោង១៣និង៣០នាទី ថ្ងៃទី៤ ខែសីហា ឆ្នាំ២០១៩ ត្រង់ចន្លោះគីឡូម៉ែត្រលេខ១០-១១ នៅលើកំណាត់ផ្លូវលេខ១៤ ស្ថិតក្នុងភូមិតាហ៊ីង ឃុំព្រែកដាច់ ស្រុកលើកដែក ខេត្តកណ្ដាល ។
មន្រ្ដីនគរបាលចរាចរណ៍ស្រុកលើកដែកបានឲ្យដឹងថា ស្រ្ដីរងគ្រោះស្លាប់បាត់បង់ជីវិតឈ្មោះ គី គាង ភេទស្រី អាយុ២៨ឆ្នាំ មុខរបរកសិករ មានទីលំនៅភូមិបឹងកណ្ដាល ឃុំសណ្ដារ ស្រុកលើកដែក ខេត្ដកណ្ដាល និងម្នាក់ទៀតឈ្មោះ ចាន់ណា ឡុងណា ភេទប្រុស អាយុ៤ឆ្នាំ ជាអ្នករួមដំណើរ មានទីលំនៅភូមិ/ឃុំជាមួយគ្នា (រងរបួសស្រាល បញ្ជូនទៅកាន់មន្ទីរពេទ្យបង្អែក ឃុំព្រែកដាច់) ។ ចំណែកភាគីខាងរថយន្ដម៉ាកអ៊ីស៊ុយស៊ុយ ប្រភេទដឹកទំនិញ ពណ៌ស ពាក់ស្លាកលេខស្វាយរៀង 3A-0425 បើកបរដោយឈ្មោះ ទឹម សុខជា ភេទប្រុស អាយុ៣៧ឆ្នាំ មុខរបរបើកបររថយន្ដ មានទីលំនៅភូមិឈូកស ឃុំបឹងណាយ ស្រុកព្រៃឈ ខេត្តកំពង់ចាម ។
ប្រភពដដែលបន្ដថា នៅមុនពេលកើតហេតុ បុរសជាប្ដីរបស់ស្រ្ដីរងគ្រោះ បានជិះរថយន្ដម៉ាកអ៊ីស៊ុយស៊ុយខាងលើ ទៅធ្វើការ ដោយបុរសជាប្ដីភ្លេចខាតការងារ ភ្លាមនោះស្រ្ដីរងគ្រោះជាប្រពន្ធបានជិះម៉ូតូយកកាតឲ្យប្ដី ដោយបើកល្បឿនលឿន ជែងរថយន្ដដែលប្តីជិះ រួចលើកដៃបក់ឲ្យតៃកង់រថយន្ដឈប់ ដោយមិនប្រុងប្រយ័ត្ន ក៏ចង្កូតម៉ូតូ ប៉ះដៃជាមួយនឹងរថយន្ដ បណ្ដាលឲ្យដួលនៅលើផ្លូវ ត្រូវរថយន្ដបើកកិនបន្ថែម ធ្វើឲ្យស្រ្ដីរងគ្រោះស្លាប់ភ្លាមៗនៅកន្លែងកើតហេតុ រីឯអ្នករួមដំណើរម្នាក់ទៀតរងរបួសស្រាល ។
ក្រោយពីមានហេតុការណ៍កើតឡើង សមត្ថកិច្ចនគរបាលចរាចរណ៍ស្រុកលើកដែក បានចុះទៅធ្វើការអន្ដរាគមន៍ ពិនិត្យ វាស់វែងកន្លែងកើតហេតុ រួចកសាងឯកសារដកហូតយករថយន្ដ និងម៉ូតូមករក្សាទុនៅអធិការដ្ឋាននគរបាលស្រុក ដើម្បីចាត់ការតាមច្បាប់ ។ ចំណែកសាកសពស្រ្ដីរងគ្រោះ ត្រូវបានក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕ ស្អាងជ័យ
