ប្តីប្រពន្ធ២នាក់ជិះម៉ូតូឌុបគ្នាត្រូវរថយន្តបើកមកបុកបណ្តាលឲ្យរងរបួសធ្ងន់ និងស្រាល រីឯម៉ូតូខ្ទេចទាំងស្រុង

ភ្នំពេញ៖ ប្តីប្រពន្ធពីរនាក់បានរងរបួសធ្ងន់ និងស្រាល បន្ទាប់ពីពួកគាត់កំពុងជិះម៉ូតូឌុបគ្នាហើយត្រូវរថយន្តដឹកដីបើកមកកៀបុកហើយកិន កាលពីវេលាម៉ោង១ និង៣០នាទីរសៀល ថ្ងៃទី១១ ខែសីហា ឆ្នាំ២០១៩ ស្ថិតនៅតាមបណ្តោយផ្លូវ៥០ម៉ែត្រ ក្នុងភូមិអន្លង់គង សង្កាត់ព្រៃស ខណ្ឌដង្កោ រាជធានីភ្នំពេញ ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញប្តីប្រពន្ធមួយគូបានជិះម៉ូតូមួយគ្រឿងម៉ាក Zoomer x ពណ៌ស លាយខ្មៅ ពាក់ស្លាកលេខ ភ្នំពេញ 1EZ -7079 ធ្វើដំណើរពីទិសដៅពីជើងទៅត្បូងលុះមកដល់ចំនុចកើតហេតុស្រាប់តែមានរថយន្តដឹកដីមួយគ្រឿងម៉ាកហ៊ីយ៉ាន់ដាយ ពណ៌លឿង ពាក់ស្លាកលេខ ភ្នំពេញ 3D -2236 បើកបរទិសដៅពីត្បូងមកជើង បំរុងនឹងបត់ឆ្វេង ក៏បានជ្រុលចង្កូតទៅបុកកិនអ្នកជិះម៉ូតូពេញទំហឹងបណ្តាលឲ្យរងរបួសធ្ងន់ និងស្រាល ហើយត្រូវបានបញ្ជូនតាមរថយន្តសាមុយទៅកាន់មន្ទីរពេទ្យសួគ៌ា ចំណែកឯម៉ូតូវិញត្រូវរថយន្តកិនរងការខូចខាតយ៉ាងដំណំ ឯអ្នកបើកបររថយន្តបានបើកទ្វាររថយន្តចុះរត់គេចខ្លួនបាត់ដោយសុវត្ថិភាព ។​

ក្រោយពេលកើតហេតុ នគរបាលជំនាញចរាចរណ៍ខណ្ឌដង្កោ បានចុះទៅវាស់វែងយករថយន្តបង្កនិងម៉ូតូជនរងគ្រោះទៅរក្សាទុកនៅអធិការដ្ឋាននគរបាលខណ្ឌដង្កោដើម្បីដោះស្រាយគ្នានៅពេលក្រោយ ៕ ភារ៉ា ដង្កោ