សារព័ត៌មាន នគរវត្ត តែងតែនាំមុខគេជានិច្ច
នៅមុនពេលអនុវត្តគោលនយោបាយធំៗ ពាក់ព័ន្ធប្រទេសជាតិ មេដឹកនាំកូរ៉េខាងជើង តែងតែទៅកាន់តំបន់សក្តិសិទ្ធិ ដូចអ្វីដែលឪពុករបស់លោកបានធ្វើនៅពេលកាន់អំណាច ។
នៅពេលនេះ មេដឹកនាំកូរ៉េខាងជើងគីម ជុងអ៊ុន ជិះសេះ ស ទៅទស្សនកិច្ច ភ្នំ Paekdu ដែលជាទីតាំងដ៏ស័ក្តិសិទ្ធិបំផុតរបស់ឧបទ្វីបកូរ៉េ និងជាទីតាំង សម្រាប់សម្រេចព្រឹត្តិការណ៍ នយោបាយ បរទេសធំធេង នៅក្នុងប្រទេសនេះ។
សារព័ត៌មានយ៉ុនហាប់ របស់កូរ៉េខាងត្បូង បានផ្សាយនៅថ្ងៃទី១៦ ខែតុលាថា មេដឹកនាំកូរ៉េខាងជើង គីម ជុងអ៊ុន បានជិះសេះស ទៅកាន់ភ្នំ Paekdu ដែលជាភ្នំខ្ពស់បំផុតនៅឧបទ្វីបកូរ៉េនិងជាទីកន្លែងកំណើតរបស់ ឪពុក គីម ជុងអ៊ីល ។ នៅពេលទស្សនកិច្ចភ្នំនោះ លោកគីម ជុងអ៊ុន បានថ្កោលទោស ដល់ការដាក់ទណ្ឌកម្មរបស់អាមេរិក ហើយអំពាវនាវដល់ពលរដ្ឋ ខិតខំ ពឹងលើខ្លួនឯងក្នុងវិស័យសេដ្ឋកិច្ច។
សារព័ត៌មានជាតិកូរ៉េខាងជើង KCNA បានផ្សាយថា មេដឹកនាំ គីម ជុងអ៊ុន បានឡើងកំពូលភ្នំ Paekdu ដោយជិះសេះស មួយក្បាលឆ្លងកាត់ព្រិល គ្រប់ដណ្តប់នៅលើភ្នំនោះ ។ ក្រៅពីនេះ មេដឹកនាំគីម ជុងអ៊ុន ក៏បានទៅទស្សនកិច្ច តំបន់ទេសចរណ៍Samjiyon នៅជើងភ្នំផងដែរ។
នៅទីនោះលោក គីម ជុងអ៊ុនថ្កោលទោស អាមេរិកយ៉ាងខ្លាំង ដោយលោក បញ្ជាក់ថា«ស្ថានភាពប្រទេសជាតិជួបនៅផលលំបាក ដោយសារតែការដាក់ទណ្ឌកម្ម អត់ឈប់ឈររបស់អាមេរិក ធ្វើឲ្យពលរដ្ឋរងទុក្ខ ។ ពេលនេះពលរដ្ឋបានប្រែក្លាយពីរងទុក្ខទៅជាខឹងសម្បាដល់អាមេរិក ហើយខិតខំពង្រឹងវិស័យសេដ្ឋកិច្ចរបស់ខ្លួន»។
កំពូលភ្នំ Paekdu គឺជាទីតាំងសក្តិសិទ្ធបំផុត មុនពេលដែលសម្រេចពីគោលនយោបាយធំៗ មេដឹកនាំកូរ៉េខាងជើងតែងតែ ទៅកាន់ទីនោះ ហើយពេលនេះ លោក គីម ជុងអ៊ុន បានទៅកាន់ភ្នំខាងលើ ធ្វើឲ្យមានពាក្យចចាមអារាមថា លោកគីម នឹងមានការសម្រេចនយោបាយធំសម្រាប់ប្រទេសជាតិ ប៉ុន្តែមិនបានបញ្ចាក់ថានយោបាយអ្វីនោះឡើយ៕
