សារព័ត៌មាន នគរវត្ត តែងតែនាំមុខគេជានិច្ច
វិវាទនយោបាយនៅក្នុងប្រទេសអង់គ្លេស ជុំវិញ បញ្ហា ប្រេស៊ីត ពេលនេះ នាយករដ្ឋមន្ត្រីបានសម្រេច រំលាយរដ្ឋសភាបោះឆ្នោតជាថ្មី ។ សភារបស់អង់គ្លេសបានចាប់ផ្តើមប្រកាសរំលាយចោលហើយ កាលពីពាក់កណ្តាលយប់ថ្ងៃទី៥ ខែវិច្ឆិកា ឆ្នាំ២០១៩ (ម៉ោងនៅក្នុងប្រទេសអង់គ្លេស) គឺគិតទៅមុខទៀតមានរយៈពេល២៥ថ្ងៃ មុនការបោះឆ្នោតជាតិនឹងចាប់ផ្តើមធ្វើឡើងនោះ។
ការរំលាយសភានៅគ្រានេះ មានន័យថា ទាំងរដ្ឋសភា និងទាំងព្រឹទ្ធសភារបស់អង់គ្លេស នឹងមិនមានសកម្មភាពអ្វីទៀតឡើយ ។ ការបោះឆ្នោតរដ្ឋសភាថ្មី នឹងធ្វើឡើងនៅថ្ងៃទី១២ ខែធ្នូ ឆ្នាំ២០១៩, រីឯព្រឹទ្ធសភាវិញ សមាជិករបស់ព្រឹទ្ធសភា គឺនៅមានតួនាទី និងមនុស្សដដែល ។
ស្ថិតនៅក្នុងកាលៈទេសៈដូចនេះ ប្រធានរដ្ឋសភាថ្មីមួយរូប ត្រូវបានជ្រើសរើស ព្រមមួយអន្លើដោយប្រធានព្រឹទ្ធសភាផងដែរ ។ ប៉ុន្តែនៅក្នុងឆ្នាំនេះ លោក Lindsay Hoyle ត្រូវបានជ្រើសរើសភ្លាមៗ ដើម្បីជំនួសតំណែងព្រឹទ្ធសភាពីលោក John Bercow ដែលបានលាលែងពីតំណែង និងបានប្រកាសកាលពីខែកញ្ញា ឆ្នាំ២០១៩ កន្លងមកនោះ ។
សូមបញ្ជាក់ថា ស្ថិតនៅក្រោមច្បាប់ឆ្នាំ២០១១ ស្តីអំពីថេរវេលារបស់សភាអង់គ្លេស គឺសភាត្រូវបោះឆ្នោតជ្រើសរើសជាថ្មីរៀងរាល់៥ឆ្នាំម្តង ហើយការបោះឆ្នោតសភានៅពេលខាងមុខនេះ ត្រូវបានរំពឹងថា នឹងកើតឡើងនៅក្នុងឆ្នាំ២០២២ ។ ប៉ុន្តែ ទោះបីយ៉ាងណាក៏ដោយ កាលពីថ្ងៃទី២៩ ខែតុលា ឆ្នាំ២០១៩ រដ្ឋសភាអង់គ្លេសបានបោះឆ្នោតសម្រេចជ្រើសរើសយកការបោះឆ្នោតមុនកាលកំណត់វិញ ដែលនឹងត្រូវធ្វើឡើងនៅក្នុងខែឆ្នូ ឆ្នាំ២០១៩ ដោយអាស្រ័យទៅលើការជាប់គាំងចេះតែបន្តកើតឡើងក្នុងបញ្ហានយោបាយអង់គ្លេសចាកចេញពីអឺរ៉ុប ឬ Brexit នោះ ៕
