សារព័ត៌មាន នគរវត្ត តែងតែនាំមុខគេជានិច្ច
បាតុកម្មនៅហុងកុងដែលផ្តើមចេញពីច្បាប់ធ្វើបត្យាប័ន ដោយកើតឡើងតាំងពី ៦ខែមុន អូសបន្លាយមកទល់ពេលនេះមិនទាន់បញ្ចប់នៅឡើយទេ បើទោះបីមានបាតុករជាច្រើនត្រូវបានចាប់ខ្លួន ។ ប៉ូលិសហុងកុងបានចាប់ខ្លួនបាតុកររាប់រយនាក់ កាលពីចុងសប្តាហ៍កន្លងមក ធ្វើឲ្យចំនួនអ្នកដែលត្រូវចាប់ខ្លួនក្នុងរយៈពេល៦ខែ នៃការផ្ទុះបាតុកម្មកើនឡើងដល់ទៅ៣ពាន់នាក់ ។
នៅក្នុងសន្និសីទកាសែត ប៉ូលិសហុងកុង បានប្រកាសថា បានចាប់ខ្លួនមនុស្ស៣២៥នាក់ ក្នុងពេល២ថ្ងៃ ដោយសង្ស័យថា មានអាវុធជាប់តាមខ្លួន ពេលចូលរួមធ្វើបាតុកម្ម ។ កាលពីថ្ងៃមុន នៅក្នុងបាតុកម្ម បុរសម្នាក់បានប្រើប្រាស់កាំបិត វាយប្រហារចាក់ ទៅលើក្រុមបាតុករ ដែលកាន់ដៃគ្នា ដង្ហែក្បួន បណ្តាលឲ្យ របួស៥នាក់ ក្នុងនោះមានអ្នកនយោបាយម្នាក់ផងដែរ ។
ប៉ូលិសហុងកុងបានប្រកាសសន្យាថា នឹងទប់ស្កាត់អំពើហិង្សាផ្ទុះឡើង ។ តាមការសន្និដ្ឋានរបស់ប៉ូលិស ពីមួយថ្ងៃទៅមួយថ្ងៃ មានអំពើហិង្សា ការបំផ្លាញទ្រព្យសម្បត្តិសាធារណៈ កាន់តែច្រើនឡើង ។
មេដឹកនាំកោះហុងកុង លោកស្រី Carrie Lam បានបំពេញសទស្សនកិច្ចទៅកាន់ទីក្រុងប៉េកាំង ជួបពិភាក្សាជាមួយថ្នាក់ដឹកនាំចិន ដើម្បីស្វែងរកដំណោះស្រាយបញ្ចប់វិវាទនៅកោះហុងកុង ដែលអូសបន្លាយ កន្លះឆ្នាំកន្លងមក ។ ជាមួយគ្នានោះ ប្រធានាធិបតីចិនស៊ី ជីងពីង សង្ឃឹមថា មេដឹកនាំកោះហុងកុង នឹងដោះស្រាយបញ្ហានៅលើកោះនេះ បានដោយជោគជ័យ លោក ស៊ី ជីនពីង មានជំនឿទៅលើការដឹកនាំរបស់លោកស្រី Carrie Lam ៕
