សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាលៈ នារីម្នាក់រងរងរបួសធ្ងន់ និង២នាក់ទៀតរងរបួសស្រាល ខណៈបើកម៉ូតូឌុបគ្នា បានបុករថយន្ដស្ទូចមួយគ្រឿងបើកបត់ឆ្វេងឆ្លងផ្លូវពេញមួយទំហឹង កាលពីវេលាម៉ោង៦ព្រឹក ថ្ងៃទី១០ ខែវិច្ឆិកា ឆ្នាំ២០១៩ លើកំណាត់ផ្លូវជាតិលេខ៦ ចន្លោះគីឡូមែត្រលេខ២៨-២៩ ស្ថិតក្នុងភូមិឫស្សីជ្រោយ ឃុំឫស្សីជ្រោយ ស្រុកមុខកំពូល ខេត្តកណ្ដាល ។
មន្រ្ដីនគរបាលចរាចរណ៍ស្រុកមុខកំពូលបានឲ្យដឹងថា ជនរងគ្រោះមានគ្នា៣នាក់ ទី១-ឈ្មោះ ស៊ុយ សុវណ្ណរ៉ា ភេទប្រុស អាយុ១៩ឆ្នាំ (រងរបួសស្រាល) ជាអ្នកបើកបរម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅពាក់ស្លាកលេខ ភ្នំពេញ1GV- 9613 ទី២-ឈ្មោះជា ឡៃសៀង ភេទស្រី អាយុ១៩ឆ្នាំ (រូមដំណើររងរបួសធ្ងន់) និងទី៣-ឈ្មោះ ឈាន ឆេងហួ ភេទប្រុស អាយុ១៩ឆ្នាំ (ជាអ្នករួមដំណើររបួសស្រាល) ។ ជនរងគ្រោះទាំង៣នាក់ មានទីលំនៅភូមិអូពពេល ឃុំខ្ចៅ ស្រុកកងមាស ខេត្តកំពង់ចាម។ ចំណែករថយន្ដម៉ាកTADANO ប្រភេទស្ទួច ធុនធំ ពណ៌លឿង គ្មានស្លាកលេខ បើកបរដោយឈ្មោះ ណន ពេជ្រ ភេទប្រុស អាយុ២០ឆ្នាំ មានទីលំនៅ ភូមិអណ្ដូងប្រាំង ឃុំស្រង់ ស្រុកគងពិសី ខេត្តកំពង់ស្ពឺ (ឃាត់ខ្លួន) ។
ប្រភពដដែលបន្ដថា នៅមុនពេលកើតហេតុ សាក្សីបានឃើញរថយន្ដស្ទូចខាងលើ ធ្វើដំណើរតាមបណ្ដោយផ្លូវជាតិលេខ៦ ក្នុងទិសដៅពីត្បូងទៅជើង លុះបើកមកដល់ចំណុចកើតហេតុ បានបត់ឆ្វេងឆ្លងផ្លូវ ខណៈនោះក៏មានម៉ូតូហុងដាមួយគ្រឿងជិះគ្នា៣នាក់ ក៏ឈប់មិនទាន់ បានបុករថយន្ដពេញមួយទំហឹងបណ្ដាលឲ្យនារីម្នាក់ឈ្មោះ ជា ឡៃសៀង ជាអ្នករួមដំណើរ ទទួលរងរបួសធ្ងន់ រីឯ២នាក់ទៀតរងរបួសស្រាល ។
ក្រោយពីមានហេតុការណ៍កើតឡើង ជនរងគ្រោះរងរបួសធ្ងន់ ត្រូវបានរថយន្ដសាមុយដឹកបញ្ជូនទៅសង្រ្គោះនៅមន្ទីរពេទ្យរាជធានីភ្នំពេញ ។ ដោយឡែករថយន្ដនឹងម៉ូតូ ត្រូវបានសមត្ថកិច្ចនគរបាលចរាចរណ៍ បានធ្វើការពិនិត្យវាស់វែង រួចកសាងសំណុំរឿងយកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធី ។
តាមការសន្និដ្ឋានរបស់សមត្ថកិច្ចជំនាញបានឲ្យដឹងថា ករណីនេះ គឺបណ្ដាលមកពីអ្នកបើកបររថយន្ត បើកបត់ឆ្វេង ខ្វះការប្រុងប្រយ័ត្ន រីឯម៉ូតូបើកបរដោយល្បឿនលឿន ៕ ស្អាងជ័យ
