សារព័ត៌មាន នគរវត្ត តែងតែនាំមុខគេជានិច្ច
កន្លងមករដ្ឋាភិបាលប៉ាឡេស្ទីនបានស្នើឲ្យតុលាការ ឧក្រិដ្ឋកម្មអន្តរជាតិ ស្រាវជ្រាវពីឧក្រិដ្ឋកម្មសង្គ្រាមនៅក្នុងប្រទេសនេះ បង្កឡើងដោយ កម្លាំងទាហានអ៊ីស្រាអែល វាយប្រហារសម្លាប់ពលរដ្ឋប៉ាឡេស្ទីនជាច្រើន ។ នៅពេលនេះអ៊ីស្រាអែលប្រឆាំងនឹងតុលាការឧក្រិដ្ឋកម្មសង្គ្រាម ដែលសម្រេចស្រាវជ្រាវនៅប៉ាឡេស្ទីន ។
នាយករដ្ឋមន្ត្រីអ៊ីស្រាអែល លោក ណេតាន់យ៉ាងហ៊ូ បានបញ្ជាក់ថា តុលាការឧក្រិដ្ឋកម្មសង្គ្រាម មានសិទ្ធិស្រាវជ្រាវ ទៅតាមសំណើរបស់ប្រទេសដែលមានដែនអធិបតេយ្យពេញលេញតែប៉ុណ្ណោះ ។
តុលាការឧក្រិដ្ឋកម្មសង្គ្រាម ICC កាលពីថ្ងៃទី២០ ខែធ្នូ បានប្រកាសថានឹងបើកការស្រាវជ្រាវ ពីឧក្រិដ្ឋកម្មសង្គ្រាមកើតឡើងនៅលើទឹកដីប៉ាឡេស្ទីនដែលបង្កឡើងដោយកម្លាំងទាហានអ៊ីស្រាអែល ។ ប្រធានតុលាការ ICC លោក Fatou Bensouda បានបញ្ជាក់ថា ការស្រាវជ្រាវជាបឋម ស្តីពី ឧក្រិដ្ឋកម្មសង្គ្រាមនៅលើទឹកដីប៉ាឡេស្ទីន ចាប់ពីឆ្នាំ២០១៥មក ។ នៅពេលនេះតុលាការមាន ព័ត៌មាន គ្រប់គ្រាន់ដើម្បីបើកការស្រាវជ្រាវជាទ្រង់ទ្រាយធំ ។
តុលាការឧក្រិដ្ឋកម្មសង្គ្រាមICC មានសិទ្ធ កាត់ក្តី ករណីឧក្រិដ្ឋកម្មសង្គ្រាម ប្រល័យពូជសាសន៍ ប្រឆាំងមនុស្សជាតិ ទៅលើប្រទេសចំនួន១២៣ដែលជាសមាជិក ។ អ៊ីស្រាអែល គឺជាប្រទេសដែលមិនចូលរួមជាសមាជិកICC នោះឡើយ ដូច្នេះគ្មានសិទ្ធកាត់ក្តីអ៊ីស្រាអែលនោះដែរ ។ ចំណែកប៉ាឡេស្ទីនគឺជាសមាជិក អាចស្នើឲ្យតុលាការត្រួតពិនិត្យបាន ។
ទាំងនោះហើយបានជាអ៊ីស្រាអែលប្រតិកម្មទៅលើតុលាការឧក្រិដ្ឋកម្មអន្តរជាតិ ។ នាយករដ្ឋមន្ត្រីអ៊ីស្រាអែលលោក Benjamin Netanyahu បានលើកឡើងថា តុលាការ ICC គ្មានសិទ្ធិក្នុងការស្រាវជ្រាវពីឧក្រិដ្ឋកម្មសង្គ្រាមនៅលើទឹកដីប៉ាឡេស្ទីននោះឡើយ ដោយប៉ាឡេស្ទីនមិនទាន់ទទួលស្គល់ជាផ្លូវការរដ្ឋអធិបតេយ្យ ។ លោក Benjamin Netanyahuបញ្ជាក់ទៀតថា ICC មានសិទ្ធ ស្រាវជ្រាវតាមសំណើររបស់ប្រទេសដែល ជារដ្ឋអធិបតេយ្យតែប៉ុណ្ណោះ ។ ចំណែកប៉ាឡេស្ទីនមិនមែនជាប្រទេសឯករាជ្យនោះឡើយ៕
