សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ជាអ្នកដឹកបន្លែ និងត្រីយកទៅឲ្យម៉ូយការនៅឯម្តុំភ្នំប្រសិទ្ធ បើកម៉ូតូកង់បីងងុយដេក បានជារេចង្កូតមកបុករថយន្តដឹកទឹកកកពីក្រោយពេញទំហឹងបណ្តាលឲ្យបោកក្បាលស្លាប់នៅនឹងកន្លែង ។
ហេតុការណ៍នេះ បានកើតឡើងកាលពីម៉ោង៥និង៣០នាទីភ្លឺថ្ងៃទី១ ខែកុម្ភៈ ឆ្នាំ២០២០ នៅតាមបណ្តោយផ្លូវជាតិលេខ៥ នៅចំណុចក្បែរ និងយឿត្រីគីឡូ៩ ស្ថិតនៅក្នុងក្រុម១ ភូមិ៣ សង្កាត់ច្រាំងចំរះ១ ខណ្ឌឫស្សីកែវ រាជធានីភ្នំពេញ ។
សមត្ថកិច្ចបានឲ្យដឹងថា ជនរងគ្រោះមានឈ្មោះ សុីម មេន អាយុ៤៧ឆ្នាំ ស្នាក់នៅម្តុំចំការដូង សង្កាត់ដង្កោ ខណ្ឌដង្កោ មានស្រុកកំណើតនៅភូមិរំចេក ឃុំរំចេក ស្រុកព្រះស្តេច ខេត្តព្រៃវែង ។
ប្រភពព័ត៌មានពីជុំវិញកន្លែងកើតហេតុបានឲ្យដឹងថា មុនពេលកើតហេតុនេះគេបានឃើញរថយន្តមួយគ្រឿងម៉ាកហ៊ីយ៉ាន់ដាយកូរ៉េដឹកទឹកកក ពណ៌ខៀវ ពាក់ស្លាកលេខ កណ្តាល 2A1939 បើកបរតាមបណ្តោយផ្លូវជាតិលេខ៥ ដោយឈប់រថយន្តក្បែរក្បាលទៅជើង ខណៈនោះស្រាប់តែមានបុរសម្នាក់បើកម៉ូតូកង់បីដឹកបន្លែ របស់គាត់គោលបំណងដឹកយកទៅឲ្យម៉ូយនៅឯម្តុំភ្នំប្រសិទ្ធធ្វើដំណើរមកតាមបណ្តោយផ្លូវជាតិលេខ៥ ក្នុងទិសដៅពីត្បូងទៅជើងលុះដែលបើកមកដល់ចំណុចកើតហេតុស្រាប់តែជនរងគ្រោះគាត់ងងុយដេក ដោយសារតែដឹកបន្លែចេញមកពីម្តុំចំការដូងហើយមួយណារថយន្តដឹកទឹកកកគាត់ឈប់អត់មានដាក់អីសំគាល់ទើបជ្រុលបុកពីក្រោយបណ្តាលឲ្យជនរងគ្រោះបោកក្បាលស្លាប់ភ្លាមៗនៅកន្លែងកើតហេតុ ចំណែកឯម្ចាស់អ្នកបើកបររថយន្តដឹកទឹកកកវិញទុករថយន្តចោលរត់គេចខ្លួនបាត់ស្រមោល ។
បន្ទាប់ពីក្រោយពេលកើតហេតុសមត្ថកិច្ចជំនាញចរាចរចុះមកវាស់វែងយករថយន្ត និងម៉ូតូទៅរក្សាទុកនៅឯការិយាល័យចរាចរផ្លូវគោករង់ចាំដោះស្រាយគ្នានៅពេលក្រោយ ចំណែកឯសពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណីនៅឯស្រុកកំណើត ៕ ជ្រោយពេជ្រ
