សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្មករ៣នាក់ បានរងរបួសធ្ងន់ ស្រាលក្នុងករណីធ្លាយស៊ីទែនហ្គាស បង្កជាអគ្គិភ័យបានឆាបឆេះយ៉ាងសន្ធោសន្ធៅនៅក្នុងស្ថានីយសាំងតេលា យីហោសម្បត្តិមានហេង ភ្លាមៗនោះសមត្ថិច្ចចុះអន្តរាគមន៍បាញ់ពន្លត់ដោយប្រើប្រាស់រថយន្តពន្លត់អគ្គិភ័យជាច្រើនគ្រឿង ទើបអាចគ្រប់គ្រងបានដោយមិនឆេះរាលដាលទៅទីតាំងផ្សេងនោះឡើយ ។
ហេតុការណ៍ឆេះហ្គាសដែលធ្លាយចេញពីស៉ីទែននេះបានកើតឡើងនៅវេលាម៉ោង៧យប់ ថ្ងៃទី៤ ខែកុម្ភៈ ឆ្នាំ២០២០ ស្ថិតនៅតាមបណ្ដោយផ្លូវជាតិលេខ១ក្បែរ វត្ថនិរោធន៍ ស្ថិតក្នុងភូមិបឹងឈូក សង្កាត់និរោធន៍ ខណ្ឌច្បារអំពៅ រាជធានីភ្នំពេញ ។
បើតាមប្រភពព័ត៌មានពី សមត្ថកិច្ចបានឲ្យដឹងថា ម្ចាស់ហ្គារ៉ាស់សាំងមានឈ្មោះ ព្រំ សុផាន់ណា ភេទស្រីអាយុ៣៥ឆ្នាំ ជាជនជាតិខ្មែរ ។ ប្រភពបន្ដពីបុគ្គលិកដែលនៅកន្លែងកើតហេតុបានឲ្យដឹងថា ដំបូងឡើយពួកគេបានឃើញមានភ្លើងចេញពីស៊ីទែនហ្គាសដ៏ធំមួយចំណុះ១២០០០លីត្រ ក្នុងការ៉ាស់សាំងតេលា យីហោសម្បត្តិមានហេង ដោយបានដឹងថា ស៊ីទែនហ្គាសនេះ បានធ្លាយហ្គាសចេញក្រៅបង្កចេញជាអណ្ដាតភ្លើងឆេះយ៉ាងសន្ធោសន្ធៅតែម្ដង ខណៈ ពេលនោះពួកគាត់ក៏នាំគ្នាយកបំពង់ពន្លត់អគ្គិភ័យកមកបាញ់ពន្លត់តែមិនរលត់ទើបទំនាក់ទំនងទៅសមត្ថកិច្ចដើម្បីជួយអន្តរាគមន៍ជាបន្ទាន់ ។
ក្រោយពីទទួលបានព័ត៌មាន សមត្ថកិច្ចផ្នែកអន្តរាគមន៍បង្ការអគ្គិភ័យបានចេញរថយន្តពន្លត់អគ្គិភ័យជាច្រើនគ្រឿងទៅធ្វើការបាញ់ពន្លត់ដោយប្រើពេលវេលាកន្លះម៉ោង ក៏បានរលត់ទៅវិញជាស្ថាពរ ដោយប្រើទឹកសរុបអស់ចំនួន២០រថយន្ត ។
ក្នុងករណីគ្រោះអគ្គិភ័យនេះដែរ បណ្ដាលឲ្យខូចខាតទ្រព្យសម្បត្តិរួមមានសម្ភារៈមួយចំនួន និងកម្មករ៣នាក់រង របួសធ្ងន់ ស្រាលបញ្ជូនទៅសង្រ្គោះនៅមន្ទីពេទ្យភ្លាមៗផងដែរ ។ រីឯមូលហេតុដែលបង្កឲ្យមានភ្លើងឆេះនេះ គឺ បណ្ដាល មកពីធ្លាយស៊ីទែនហ្គាសចំណុះ ១២០០០លីត្រ ។
សូមបញ្ជាក់ថា នៅព្រឹកថ្ងៃទី៥ ខែកុម្ភៈ ឆ្នាំ២០២០ លោកចេង មុនីរ៉ាអភិបាលនៃគណះអភិបាលខណ្ឌច្បារអំពៅអមដំណើរដោយលោកលោកស្រីអភិបាលរងខណ្ឌ និងលោកនាយករដ្ឋបាលសាលាខណ្ឌបាននាំយកអំណោយផ្តល់ដល់កម្មករចំនួន៣នាក់ដែលរងគ្រោះដោយអគ្គិភ័យ ។
ក្នុងឱកាសចុះសាកសួរសុខទុក្ខដល់ប្អូនៗកម្មករនៅមន្ទីរពេទ្យកាល់ម៉ែត លោកចេង មុនីរ៉ា ក៏បានសំដែងនូវក្តីរន្ធត់ និងអាណិតអាសូរដល់ប្អូនៗហើយក្នុងនោះលោកអភិបាលខណ្ឌ ក៏បាននាំយកផ្លែឈើ ភេសជ្ជៈ និងថវិកាផ្តល់ដល់ប្អូនៗទាំង៣នាក់ឲ្យឆាប់ជាសះស្បើយពីជំងឺរលាគភ្លើងនេះ ។
កម្មករទាំង៣នាក់ ដែលរងរបួសនោះគឺទី១ឈ្មោះ ស្រួច ញៀន ភេទប្រុស អាយុ១៨ឆ្នាំ ជាកម្មករលាងឡាន ។ ទី២ឈ្មោះ កួង បូរ៉ា ភេទប្រុស អាយុ១៧ឆ្នាំ ជាកម្មករលាងឡាន និងទី៣ឈ្មោះ ស៊ន សុីថា ភេទប្រុសអាយុ៣៨ឆ្នាំជាបុគ្គលិកលក់ហ្គាសក្នុង ស្ថានីយចាក់ប្រេងនៅចំណុចកើត៕ សណ្តោស
