សារព័ត៌មាន នគរវត្ត តែងតែនាំមុខគេជានិច្ច
ចិនជាប្រទេសផ្គត់ផ្គងគ្រឿងបន្លាស់ នៅក្នុងវិស័យឧស្សាហកម្មជាច្រើននៅជុំវិញពិភពលោក ពិសេសគឺវិស័យអេឡិចត្រូនិក ក៏ដូចជាការផលិតគ្រឿងចក្ររថយន្តជាដើម ។ ការឆ្លងរាលដាលនៃវីរុស COVID-19 បានជះឥទ្ថិពលយ៉ាងខ្លាំង ដោយក្រុមហ៊ុនជាច្រើនត្រូវផ្អាក់ដំណើរការ ។
ជាក់ស្តែង ក្រុមហ៊ុនផលិតរថយន្ដ Hyundai Motor បានពឹងផ្អែកយ៉ាងខ្លាំងលើប្រទេសចិន ដើម្បីផ្គត់ផ្ដង់គ្រឿងបន្លាស់រថយន្ដ ទៅកាន់រោងចក្រផលិតរថយន្ដរបស់ខ្លួន នៅក្នុងប្រទេសកូរ៉េខាងត្បួង អស់រយៈពេលជាច្រើនឆ្នាំមកនេះ ។ ប៉ុន្តែដោយសារតែការផ្ទុះវីរុសកូរ៉ូណាថ្មី COVID-19 ចង្វាក់ផលិតកម្ម និងយុទ្ធសាស្ត្ររបស់ក្រុមហ៊ុនកំពុងជួបផលលំបាក ។
ចាប់តាំងពីថ្ងៃចូលឆ្នាំចិនមក កម្មកររាប់រយនាក់មិនអាចត្រឡប់ទៅធ្វើការវិញបាន នៅឯរោងចក្រ០២ ក្នុងចំណោម០៤ របស់ក្រុមហ៊ុន Hyundai នៅក្នុងខេត្តជាងស៊ូ (Jiangsu) និងទីក្រុង ឈីងដាវ (Qingdao) ដោយសារតែព្រួយបារម្ភពីការឆ្លងវីរុសកូរ៉ូណាថ្មី ។ ជាក់ស្ដែងបច្ចុប្បន្នក្រុមហ៊ុនគ្យុងស៊ីន (Kyungshin) ដែលជាអ្នកផ្គត់ផ្គង់ជិតពាក់កណ្ដាលនៃប្រព័ន្ធខ្សែភ្លើង សម្រាប់ប្រព័ន្ធអគ្គិសនីរថយន្ដក្រុមហ៊ុន Hyundai បាននិងកំពុងរងផលប៉ះពាល់យ៉ាងខ្លាំង ដោយសង្វាក់ផលិតកម្មមានការធ្លាក់ចុះ ។
តែយ៉ាងណាក៏ដោយ បើតាមប្រភពមួយក្នុងលក្ខខណ្ឌមិនបញ្ចេញឈ្មោះ Hyundai បានបង្កើនការផលិតនៅតាមរោងចក្ររបស់ខ្លួន នៅក្នុងសហរដ្ឋអាមេរិក ឥណ្ឌា កម្ពុជា និងកូរ៉េខាងត្បូង ខណៈក្រុមហ៊ុនមានផែនការប្រើប្រាស់យន្ដហោះ និងកប៉ាល់ដើម្បីដឹកជញ្ជូនគ្រឿងបន្លាស់ ទៅកាន់ប្រទេសកូរ៉េខាងត្បូង ។ បើតាមទិន្នន័យ ពីសមាគមឧស្សាហកម្មរថយន្ដកូរ៉េខាងត្បូង ក្រុមហ៊ុនកូរ៉េខាងត្បូងផ្គត់ផ្គង់គ្រឿងបន្លាស់លំដាប់ទី១ និងទី២ ចំនួន១៧០ បាននិងកំពុងដំណើរការរោងចក្ររបស់ពួកគេ ជាង៣០០កន្លែងនៅក្នុងប្រទេសចិន៕
