សារព័ត៌មាន នគរវត្ត តែងតែនាំមុខគេជានិច្ច
ប្រធាន UNថា កុមារជាង ២៥០ លាននាក់ រងផលប៉ះពាល់ដោយសារអំពើអរិភាព
អគ្គលេខាធិការអង្គការសហប្រជាជាតិ លោក Antonio Guterres ថ្លែងទៅកាន់ក្រុមប្រឹក្សាសន្តិសុខរបស់UN នៅថ្ងៃទី១២ ខែកុម្ភៈ ថា កុមារប្រហែល២៥០លាននាក់បាននិងកំពុងរងផលប៉ះពាល់ និងរស់នៅក្នុងប្រទេសទាំងឡាយកំពុងហែកហួរញាំញីដោយអំពើហិង្សា ជម្លោះប្រដាប់អាវុធ សង្គ្រាមស៊ីវិលកើតឡើង ។
លោក Guterres បានថ្លែងទៀតថា ក្នុងឆ្នាំ២០១៨ កុមារជាង ១២ ០០០នាក់បានស្លាប់ និងរបួសដោយសារលទ្ធផលមកពីជម្លោះទាំងអស់នោះ ជាតួលេខខ្ពស់ជាងគេបំផុតចាប់តាំងពីឆ្នាំ១៩៩៦រហូតមក ។
ថ្លែងក្នុងឱកាសទិវាអន្តរជាតិប្រឆាំងការប្រើប្រាស់កុមារធ្វើជាកម្លាំងយោធា, លោកអគ្គលេខាធិការបានបញ្ជាក់ថា កុមារអាយុក្រោម១៨ឆ្នាំ មានចំនួនកើនឡើងជាង៥០ភាគរយ រងផលប៉ះពាល់នៅក្នុងប្រទេសដែលកំពុងមានសង្គ្រាម ។ កុមារទាំងនោះកំពុងក្លាយជាជនងាយរងគ្រោះបំផុត និងមិនអាចការពារខ្លួនពួកគេបានពីផលប៉ះពាល់នៃជម្លោះប្រដាប់អាវុធទាំងនោះបានឡើយ ។
លោក Guterres បានថ្លែងថា ក្នុងឆ្នាំ២០១៨ មានករណីរំលោភបំពានទៅលើកុមារជាង២៤ ០០០ករណី ត្រូវបានកត់ត្រាទុក គឺកើនឡើងជាងកាលពីឆ្នាំ២០១៧ ដែលមានតែ ២១ ០០០ករណី។
លោកបានបន្តថា យុទ្ធនាការទូទាំងពិភពលោក ក៏បានអនុវត្តឡើងផងដែរ ក្នុងនោះ រួមមានដូចជាយុទ្ធនាការ «កុមារ មិនត្រូវបានប្រើប្រាស់ធ្វើជាកងកម្លាំង» ក៏ដូចជាកតិកាការពារថ្មីដើម្បីជួយដល់ពួកគេ គេចផុតបានពីការប្រើប្រាស់នៅក្នុងជម្លោះនោះ ។ ប៉ុន្តែយ៉ាងណាក៏ដោយ ក៏តួលេខកុមាររងគ្រោះ នៅតែមានកំណើនកើនឡើងជាដរាប ។
លោកបញ្ជាក់ថា កតាកំណើនទាំងអស់នេះ ដោយសារតែអំពើអរិភាពដ៏ធ្ងន់ធ្ងរ និងការមិនយកចិត្តទុកដាក់ដ៏គួរឲ្យខ្មាស់អៀនចំពោះអាយុជីវិតជនស៊ីវិល ។
លោកអគ្គលេខាធិការអង្គការសហប្រជាជាតិបានជំរុញប្រទេសទាំងអស់ ត្រូវតែមានវិធានការសកម្មភាពរឹងមាំដើម្បីការពារកុមារដែលរងផលបះពាល់ដោយសារជម្លោះទាំងនោះ ដោយចាត់ទុកថាកិច្ចការនេះជាការងារអាទិភាព ៕
