សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សិល្បករជាច្រើនបានបង្ហារ និងអារម្មណ៍សោកស្តាយក្រោយពីម្តាយបង្កើតរបស់តារាសម្តែង ហង្ស សម្បើមស័ក្តទទួលមរណភាពព្រោះតែជំងឺប្រចាំកាយកាលពីរសៀលថ្ងៃទី១៥ ខែមេសាឆ្នាំ ២០២០នេះ។
លោក ហង្ស សម្បើមស័ក្ដ ត្រូវបានគេដឹងជាយូរមកហើយថាលោកមានម្ដាយជរាម្នាក់មានកើតជំងឺមហារីក ហើយលោកប្រឹងប្រែងធ្វើការងារសិល្បៈទាំងឡាយ ដើម្បីបានប្រាក់មក គឺគ្រាន់តែទុកមើលថែនិងព្យាបាលអ្នកមានគុណប៉ុណ្ណោះ។
អ្នកសិល្បៈបង្ហើបថាកន្លងទៅតារាសម្តែងរូបនេះប្រឹងប្រែងនឹងការងារគ្រប់មុខឲ្យតែអាចរកប្រាក់ចំណូលបានដើម្បីទប់ទល់នឹងជីវភាព បើទោះបីជាការងារខ្លះដូចជាការលក់ប្រហិតតាមផ្លូវជាដើម។
ប្រភពថាកម្មវិធីសប្បាយមួយចំនួនធំត្រូវបានតារារូបនេះកាត់បន្ថយដើម្បីមានពេលវេលារកស៊ី និងជួយមើលថែម្តាយដែលមានជំងឺមហារីកប្រចាំកាយ ដែលត្រូវការការថែទាំ ហើយជាញឹកញាប់តារាសម្តែង និងពិធីកររូបនេះបានចំណាយថវិកាច្រើនដើម្បីនាំម្តាយទៅមន្ទីរពេទ្យនៅប្រទេសថៃជាប្រចាំ។ ដំណឹងនៃការមើលថែទាំម្តាយចាស់មានជំងឺក៏ធ្លាប់ត្រូវបានតារាសម្តែងវ័យ៣៤ឆ្នាំរូបនេះទម្លាយក្រោយពីលេចទំនាស់នឹងផលិតកម្មមហាហង្សដែលខកខានក្នុងការបើកប្រាក់ឈ្នូលថតភាពយន្តផងដែរ។ ប្រភពពីអ្នកសិល្បៈលើកឡើងថា បើទោះបីជាអ្នកសិល្បករជាច្រើនសម្រាកពីការងារសិល្បៈក្តីក៏តារារូបនេះបន្តថតភាពយន្តរឿង”កូនឥតខាន់ស្លា” របស់ផលិតកម្មសាស្ត្រា រហូតដល់ថ្ងៃចូលឆ្នាំ និងរហូតមានអ្នកទូរស័ព្ទហៅក្រោយពេលស្ថានភាពម្តាយររបស់លោកមិនប្រក្រតី។
សពម្ដាយរបស់លោក ហង្ស សម្បើមស័ក្ត ត្រូវបានក្រុមគ្រួសារយកទៅតម្កល់ធ្វើបុណ្យនៅវត្តទួលសង្កែ។ ក្នុងនោះមានបណ្ដាសិល្បករសិល្បការិនី និងអ្នកលេងបណ្ដាញសង្គមបានបង្ហាញនូវសាររំលែកទុក្ខជាហូរហែចំពោះតារាសម្ដែងលោក ហង្ស សម្បើមស័ក្តិ ខណៈនៅថ្ងៃនេះលោកបានជួបទុក្ខធំម្ដាយជាទីស្រលាញ់បានលាចាកលោក ក្រោមការសោកស្ដាយពីគ្រួសារយ៉ាងអាឡោះអាល័យ ៕ ដោយ វឌ្ឍនា
