បុរសម្នាក់ ត្រូវប៉ូលិសអូស្ត្រាលីបាញ់សម្លាប់ក្នុងផ្សារទំនើប ក្រោយប្រើកាំបិត ចាក់មនុស្សឲ្យរបួសជាច្រើននាក់

ប្រទេសអូស្ត្រាលី៖ យ៉ាងហោចណាស់មនុស្ស៥នាក់ បានរងរបួសធ្ងន់ស្រាលក្នុងការវាយប្រហារដោយកាំបិត ប៉ុន្ដែជនដៃដល់ ត្រូវប៉ូលិសនៅក្នុងរដ្ឋភាគខាងលិច (Western Australia) នៃប្រទេសអូស្ត្រាលី បានបាញ់សម្លាប់ភ្លាមៗ នៅផ្សារទំនើបមួយកន្លែងក្នុងតំបន់ ភីលបារ៉ា(Pilbara) ។

តាមការចេញផ្សាយដោយ សារព័ត៌មាន BBC នៅរសៀលថ្ងៃសុក្រ ទី០១ខែឧសភា ឆ្នាំ២០២០ បាននិយាយថា ហេតុការណ៍ ចាក់ឱ្យមនុស្សរបួសខាងលើ កើតឡើងនៅម៉ោង ១០និង០០នាទីព្រឹកថ្ងៃដដែល (ម៉ោងនៅក្នុងតំបន់) នៅផ្សារទំនើប សោតដេនឡេន សាខ្វែរ (South Hedland Square)។ ចំណែកឯប៉ូលិសវិញក៏បានឱ្យដឹងដែរថា មនុស្ស ០៥នាក់បានរងរបួស នៅក្នុងការវាយប្រហារដោយកាំបិត ហើយក្នុងនោះមាន ០២នាក់រងរបួសធ្ងន់។

ប៉ុន្តែភ្លាមៗ ជនសង្ស័យមិនទាន់ត្រូវបានគេបញ្ជាក់អត្តសញ្ញាណនៅឡើយទេខណៈមូលហេតុពិតប្រាកដនៃការវាយប្រហារនេះ បច្ចុប្បន្នកំពុងស្ថិតនៅក្រោមការស៊ើបអង្កេតនៅឡើយ៕

ដោយ៖ស តារា