សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ ក្រុមការងារស្រាវជ្រាវសត្វព្រៃនៃអង្គការ WWF បានជួបនឹងសត្វដំរីអាស៊ីមួយហ្វូងនៅពាក់កណ្តាលខែមេសា ឆ្នាំ២០២០នេះ ខណៈពេលដែលពួកគេ កំពុងតាមដាន និងប្រមូលព័ត៌មានស្តីពីសត្វព្រៃនៅក្នុងដែនជម្រកសត្វព្រៃស្រែពក ដែលស្ថិតក្រោមការគ្រប់គ្រងរបស់មន្ទីរបរិស្ថានខេត្តមណ្ឌលគិរី នៃក្រសួងបរិស្ថាន និងគាំទ្រដោយអង្គការ WWF ។
បើតាមការបញ្ជាក់របស់អ្នកវិទ្យាសាស្រ្តខាងសត្វព្រៃ របស់អង្គការ WWFបានឱ្យដឹងថា នៅក្នុងចំណោមហ្វូងសត្វដំរីអាស៊ីនេះ មានដំរីពេញវ័យប្រមាណជាចំនួន០៥ក្បាល កូនដំរី ចំនួន០៤ក្បាល និងដំរីវ័យជំទង់ប្រមាណជាចំនួន០៤ក្បាលផងដែរ។ ជាមួយគ្នានេះ តាមរយៈវីដេអូដែលក្រុមការងារស្រាវជ្រាវសត្វព្រៃនៃអង្គការ WWF ថតបាន សង្កេតឃើញដែរថាកូនដំរីបានផ្តុំគ្នានៅជិតមេរបស់ពួកគេ ខ្លះទំពាអៀង ខ្លះទៀត យោលប្រមោយលេងជាមួយមេរបស់ខ្លួន ខណៈពូជដំរីអាស៊ីមួយហ្វូងនេះ កំពុងតែសម្រាកជុំគ្នានៅក្នុងទីជម្រកព្រៃល្បោះមួយនេះយ៉ាងសុខសាន្ត។
តាមរយៈវីដេអូខ្លីដែលថតដោយសមាជិកក្រុមស្រាវជ្រាវ ពីលើដើមឈើមួយដែលជា ទីខ្ពស់សុវត្ថិភាព ជាភស្តុតាងមួយដែលបង្ហាញអំពីវត្តមាននៃពូជដំរីអាស៊ីនៅក្នុង តំបន់ព្រៃការពារ និងលទ្ធភាពបង្កកំណើតរបស់ពួកវា ដែលជាសញ្ញាវិជ្ជមានសម្រាប់ការអភិរក្ស៕ ហេង សូរិយា
