សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ៖ រថយន្តវេអងមួយគ្រឿងដឹកឈើផ្ទះចាស់បង្កប់ឈើអារថ្មីត្រូវបានកម្លាំងកងរាជអាវុធហត្ថរួមសហការជាមួយមន្ត្រីសង្កាត់រដ្ឋបាលព្រៃឈើស្ទាក់ចាប់បានភ្លាមៗដើម្បីចាត់ការតាមច្បាប់ព្រៃឈើ។
ការស្ទាក់បង្ក្រាបរថយន្តដឹកឈើគ្រឿងផ្ទះចាស់បង្កប់ឈើថ្មីនោះសមត្ថកិច្ចបានធ្វើឡើងនៅវេលាម៉ោង ៩៖៥០នាទីព្រឹកថ្ងៃទី១០ ខែមិថុនា ឆ្នាំ២០២០ត្រង់ចំណុចUTM(៦២៧៣០៤-១៤៣២៤៦៦)ស្ថិតនៅភូមិអូរគ្រៀង ឃុំអូរគ្រៀង ស្រុកសំបូរ ខេត្តក្រចេះ។
ការចុះបង្ក្រាបនោះកម្លាំងស្នាក់ការសន្តិសុខ៧១០ ដឹកនាំដោយលោក អនុសេនីយ៍ឯក ជា សាងហុង ប្រធានស្នាក់ការ បានសហការជាមួយមន្ត្រីសង្កាត់រដ្ឋបាលព្រៃឈើអូរគ្រៀងដឹកនាំដោយលោក កែវ ចំណាន នាយសង្កាត់បានចុះបង្ក្រាបរថយន្តមួយគ្រឿងម៉ាកវេអងមានដឹកឈើផ្ទះចាស់បង្កប់ឈើអារថ្មីៗនៅពីក្រោម។
រថយន្តវេអងនោះម៉ាកហីុយ៉ាន់ដាយមានក្បាលពណ៌ស ទ្រុងពណ៌ខៀវ ពាក់ស្លាកលេខត្បូងឃ្មុំ ៣A-០៦៤៨។
ពេលធ្វើការឆែកឆេរនោះ គេឃើញនៅក្នុងរថយន្តមានដឹកឈើប្រភេទលេខពីរ(គ្រឿងផ្ទះ និងក្តារ)ធ្វើចរាចរណ៍លើដងផ្លូវជាតិលេខ៧Aចេញពីខេត្តស្ទឹងត្រែងឆ្ពោះទៅខេត្តក្រចេះ ហើយមានឈើពេញព្រៀបតែម្តង ប៉ុន្តែមិនទាន់បានដឹងចំនួនតួលេខពិតប្រាកដនៅឡើយ។
ក្រោយបង្រ្កាបបានរថយន្តនិងវត្ថុតាងខាងលើមកកម្លាំងសមត្ថកិច្ចបានយកទៅរក្សាទុកនៅសង្កាត់រដ្ឋបាលព្រៃឈើអូរគ្រៀងដើម្បីធ្វើការវាស់វែង និងចាត់ការតាមនីតិវិធីច្បាប់ព្រៃឈើបន្តទៀត៕ដោយ៖ ជីវ័ន្ត
