សារព័ត៌មាន នគរវត្ត តែងតែនាំមុខគេជានិច្ច
សារព័ត៌មានយ៉ុនហាប់ របស់កូរ៉េខាងត្បូងបានផ្សាយថា កម្លាំងទាហានប្រទេសនេះ នៅថ្ងៃ ទី១១ ខែមិថុនា បានធ្វើសមយុទ្ធបាញ់គ្រាប់ពិត នៅតំបន់សមុទ្រភាគខាងកើតប្រទេសនេះ ។ សមយុទ្ធធ្វើឡើង ក្នុងពេលកូរ៉េទាំងពីរកំពុងប្រឈមមុខតានតឹងដាក់គ្នា ហើយកូរ៉េខាងជើង បានកាត់ផ្តាច់បណ្តាញទំនាក់ទំនង នៅព្រំដែន។
សមយុទ្ធពេលដំបូងគ្រោងធ្វើឡើងនៅ ខែឧសភា ប៉ុន្តែត្រូវផ្អាកវិញដោយសារតែអាកាសធាតុមិនអំណោយផល។ មួយវិញទៀតទីក្រុងសេអ៊ូល មានចេតនាចង់ផ្អាកដើម្បីបញ្ចៀសការប្រឈមមុខតានតឹងជាមួយកូរ៉េខាងជើង ដោយរាល់ការធ្វើសមយុទ្ធតែងតែរងការប្រតិកម្មយ៉ាងខ្លាំងពីកូរ៉េខាងជើង ។
សមយុទ្ធដែលត្រូវធ្វើឡើង១ឆ្នាំពីរលើក ដោយមានកម្លាំងទាហានជើងទឹកនិងជើងគោកចូលរួម។សមយុទ្ធធ្វើឡើងនៅឆ្នេរសមុទ្រទីក្រុង Uljin មានចម្ងាយពី ទីក្រុងសេអ៊ូល៣៣០ គីឡូម៉ែត្រ ។ នៅក្នុងសមយុទ្ធនោះមានសម្ភារសឹកជាច្រើនប្រភេទ មានទាំង រ៉ុក្កែតទៀតផង។
ទំនាក់ទំនងរវាងបងប្អូនកូរ៉េទាំងពីរល្អប្រសើរបានមួយរយៈក៏ប្រឈមមុខតានតឹងដាក់គ្នាជាថ្មី ក្រោយពេល មានក្រុមប្រឆាំងកូរ៉េខាងជើង នៅកូរ៉េខាងត្បូងលួចបង្ហោះសារ នាំទំាងអង្ករ និងស្បៀងអាហារមួយចំនួនទៅកាន់កូរ៉េខាងជើង ជាការបំពានទៅលើកិច្ចព្រមព្រៀងបញ្ចប់សកម្មភាពប្រឆាំងកូរ៉េខាងជើង។ ហេតុការទាំងនោះហើយបានធ្វើឲ្យកូរ៉េខាងជើងខឹងសម្បាយ៉ាងខ្លាំង ទើបកាត់ផ្តាច់ទំនាក់ទំនង។
ប៉ុន្តែកន្លងមកកូរ៉េខាងត្បូង ក៏បានសម្រេចដាក់ទណ្ឌកម្មទៅលើអង្គការ និងស្ថាប័នចំនួន៣ ដែលធ្វើឲ្យស្ថានភាពទំនាក់ទំនងប្រទេសទាំងពីរកាន់តែតានតឹង៕ដោយ៖ធី រីណា
