សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង៖ កម្លាំងនគរបាលការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តស្ទឹងត្រែង សហការជាមួយកម្លាំងអធិការដ្ឋាននគរបាលស្រុកបុរីអូរស្វាយសែនជ័យ បានឃាត់ខ្លួនមនុស្សពីរនាក់ពាក់ព័ន្ធនឹងករណីរក្សាទុក ការជួញដូរ និងប្រើប្រាស់នូវសារធាតុញៀនខុសច្បាប់ ដែលប្រព្រឹត្តនៅថ្ងៃទី១៨ ខែមិថុនា ឆ្នាំ២០២០ នៅចំណុចវ៉ើនខាំ ក្នុងភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង។
ប្រភពព័ត៌មានបានឲ្យដឹងថា ក្រោយពីដឹងមុខសញ្ញាជាក់លាក់ទើបកម្លាំងអធិការដ្ឋាននគរបាលស្រុកបុរីអូរស្វាយសែនជ័យ រួមសហការជាមួយ កម្លាំងនគរបាលប៉ុស្តិ៍រដ្ឋបាលឃុំអូរស្វាយ ចុះប្រតិបត្តិការពួនស្ទាក់បង្ក្រាបបានម៉ូតូមួយគ្រឿងម៉ាកវ៉េវអាល់ហ្វាគ្មានស្លាកលេខ រួមទាំងវត្ថុតាងគ្រឿងញៀន ហើយនិង
ជនសង្ស័យចំនួន២នាក់ គឺម្នាក់ឈ្មោះ ធី អិ ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ និងម្នាក់ទៀតឈ្មោះ លន់ ពុទ្ធី ភេទប្រុស អាយុ ៣៤ឆ្នាំ ជនជាតិខ្មែរ មុខរបរមិនពិតប្រាកដ អ្នក
ទាំង២រស់នៅ ភូមិរិទ្ធីសែនជ័យ១ ឃុំអូរស្វាយ ស្រុកបុរីអូរស្វាយសែនជ័យ។
បន្ទាប់ពីការឃាត់ខ្លួនកម្លាំងនគរបាលបានដកហូតវត្ថុតាង រួមមានថ្នាំញៀន ២កញ្ចប់តូច ប្រភេទមេតំហេ្វតាមីនគ្រាប់(WY) ចំនួន២៩២គ្រាប់ ម៉ូតូមួយគ្រឿងម៉ាកវ៉េវអាល់ហ្វា ពណ៌ខ្មៅអត់ស្លាកលេខ ធុងបាស់ ៤០០វ៉ាត់មួយគ្រឿង ត្រង់សុីន័រមួយគ្រឿងនិងគ្រឿងបន្លាស់ ក្នុងនោះក៏មានដង្កាប់ផងដែរ។
បច្ចុប្បន្នសមត្ថកិច្ចកំពុងកសាងសំណុំរឿងបញ្ជូនជនសង្ស័យទៅសាលាដំបូងខេត្ត ចាត់ការតាមនីតិវិធីច្បាប់ ៕
ដោយ៖មាស សុផាត
