ចោរមួយក្រុមឆក់កាបូបស្ពាយពីនារីម្នាក់បានសម្រេចនៅសង្កាត់ស្ទឹងមានជ័យ១

      ភ្នំពេញ​ ៖​ មានជនសង្ស័យមួយក្រុមបានជិះម៉ូតូធ្វើសកម្មភាពឆក់កាបូបស្ពាយនារីម្នាក់បានសម្រេចគេចខ្លួនបានដោយសុវត្ថិភាពកាលពីវេលាម៉ោង១៩និង៣០នាទីយប់ថ្ងៃទី២៤ ខែមិថុនា ឆ្នាំ២០២០ នៅតាមបណ្តោយផ្លូវ២៧១សង្កាត់ស្ទឹងមានជ័យ១​ ខណ្ឌមានជ័យ។

ជនរងគ្រោះឈ្មោះ អាង ស៊ីថូ ភេទស្រី​ អាយុ១៨ឆ្នាំ មុខរបរជាងសំអាង បច្ចុប្បន្នស្នាក់នៅផ្ទះជួលម្តុំបឹងត្របែក មានស្រុកកំណើតនៅភូមិវិហារសួគ៌ ស្រុកខ្សាច់កណ្តាល ខេត្តកណ្តាល។

​    តាមការរៀបរាប់ពីនារីរងគ្រោះខាងលើបានឲ្យដឹងថា​ មុនពេលកើតហេតុ ខ្លួនបានចេញពីហាងសំអាង នៅម្តុំផ្លូវអតីត២០០៤ ដោយជិះ passapp ក្នុងទិសដៅឆ្ពោះទៅផ្ទះ លុះពេលធ្វើដំណើរមកជិតដល់គល់ស្ពានអាកាសស្ទឹងមានជ័យ ស្រាប់តែលេចមុខជនសង្ស័យ២នាក់ជិះម៉ូតូមិនចាំម៉ាក បានធ្វើសកម្មភាពឆក់កាបូបស្ពាយ ដែលដាក់នៅក្បែរខ្លួន បានសម្រេចរួចជនសង្ស័យទាំងនោះជិះគេចខ្លួនបាត់ស្រមោល ទោះខំប្រឹងស្រែកឆោឡោពីចម្ងាយក៏មិនបានការ។  ហេីយនារីរងគ្រោះបានបន្ថែមទៀតថា សំភារៈដែលបាត់បង់នៅក្នុងកាបូបស្ពាយនោះរួមមាន ទូរស័ព្ទម៉ាក iphone ភ្នែក៣មួយគ្រឿង ទូរស័ព្ទម៉ាក samsung មួយគ្រឿង លុយ៤ម៉ឺនរៀល និងសំភារៈមួយចំនួនទៀត។

​     ក្រោយពេលកើតហេតុ​ នារីរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលស្ទឹងមានជ័យ១ ដើម្បីឲ្យសមត្ថកិច្ចកំណត់មុខសញ្ញា និងស្រាវជ្រាវតាមចាប់ជនសង្ស័យយកមកផ្ដន្ទាទោសតាមច្បាប់៕​ ដោយ៖​ ភារ៉ា​ ដង្កោ