សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ តារាចម្រៀងលេចធ្លោរ លោក ខាន់ ជេមស៍ ទើបនឹងបញ្ចេញបទចម្រៀងថ្មីរបស់លោកក្នុងផលិតកម្មសាន់ដេ ដោយច្រៀងរួមគ្នាជាមួយតារាចម្រៀងឯនាយសមុទ្រលោក Jay Chan។
អ្នកចម្រៀងខ្មែរអាមេរិកកាំង លោក Jay Chan ត្រូវបានគេស្គាល់ច្រើនក្រោយលោកបានយកស្នាដៃបទចម្រៀងមរតកដើមមួយចំនួនច្រៀងឡើងវិញពិសេសបទ «ព្រោះតែអូន» ដែលធ្វើឲ្យទស្សនិកជនរាំកក្រើក កាលពីប៉ុន្មានខែមុននោះ។ ថ្មីៗនេះផលិតកម្មសាន់ដេបានបង្ហាញនូវបទចម្រៀងថ្មីរបស់ខ្លួនមួយបទមានចំណងជើងថា «បុបា្ជ California» ដែលបកស្រាយដោយលោក ខាន់ ជេមស៍ និង លោក Jay Chan ចំពោះបទថ្មីនេះត្រូវបានផលិតកម្មបញ្ជាក់ជូនមហាជនឲ្យដឹងថា៖ «សំនៀងដើមលោក ពៅ ហ៊ុនសម្រួលតន្រ្តីឡើងវិញដោយ ៖ ភួង សុភារក្ស»។
ទន្ទឹមការចេញបទថ្មីបែបស៊ីវិល័យរួមផ្សំសម្លេងដ៏ពិរោះលើកនេះត្រូវបានអ្នកគាំទ្រជាច្រើនបានលើកឡើង និងពោលសរសើរទាំងជញ្ជក់មាត់ថា៖ «ពិរោះណាស់អាយដលទាំង២»។
យ៉ាងណាក្ដីក្រោយការបង្ហាញខ្លួនរបស់លោក Jay Chan ដែលគេដឹងថាជាអ្នកចម្រៀងឯនាយសមុទ្រនោះក៏មានការចោទសួរថាតើអ្នកចម្រៀងឯនាយសមុទ្ររូបនេះបានក្លាយជាតារាចម្រៀងចំណូលថ្មីរបស់ផលិតកម្មសាន់ដេ ដែរឬយ៉ាងណា? ឬគ្រាន់តែជាការចាប់ដៃគ្នា និងព្រមព្រៀងពីគ្រប់ភាគីដើម្បីបម្រើអារម្មណ៍បងប្អូនអ្នកគាំទ្រប៉ុណ្ណោះ។
លោក Jay Chan បានថ្លែងសាររីករាយដែលបានច្រៀងរួមជាមួយតារាចម្រៀងប្រចាំផលិតកម្មសាន់ដេ លោក ខាន់ ជេមស៍ដែលលោកថាបទចម្រៀងនេះធ្លាប់បានគេស្គាល់ច្រើននៅសហរដ្ឋអាមេរិកកាលពីអំឡុងទសវត្សរ៍ទី៨០ និងត្រូវបានលើកយកមកច្រៀងឡើងវិញនៅពេលនេះ៕ ដោយ ៖វឌ្ឍនា
