សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖បុរសម្នាក់ជាជាងតបណ្តាញអគ្គិសនីរបស់ក្រុមហ៊ុនអានកូ ត្រូវចរន្តអគ្គិសនីឆក់ស្លាប់នៅវេលាម៉ោង០៣និង១០នាទីរសៀល ថ្ងៃទី១ខែកក្កដាឆ្នាំ២០២០នៅចំណុចផ្លូវចូលប៉ុស្តិ៍រដ្ឋបាលផ្សារកណ្តាល ស្ថិតក្នុងភូមិផ្សារកណ្តាល សង្កាត់ផ្សារកណ្ដាល ក្រុងប៉ោយប៉ែត ។
លោក ធិន ស៊ិនដេត អធិការនគរបាល ក្រុងប៉ោយប៉ែត បានឲ្យដឹងថាជនរងគ្រោះ ឈ្មោះ ឈន សាវុធ ភេទប្រុសអាយុ៣០ឆ្នាំ មានទីលំនៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត មុខរបរជាបុគ្គលិកអគ្គិសនីក្រុមហ៊ុនអានកូ ។
លោកបញ្ជាក់ថានៅមុនពេលកើតហេតុ ជនរងគ្រោះ និង អ្នករួមការងារចំនួន០៤នាក់ផ្សេងទៀតបានឡើងបង្គោលភ្លើង នៅចំណុចផ្លូវចូលប៉ុស្តិ៍រដ្ឋបាលផ្សារកណ្តាល ដើម្បីតភ្ជាប់ចរន្តអគ្គិសនី ដើម្បីចែកចាយឲ្យអតិថិជានប្រើប្រាស់ស្ថិតក្នុងភូមិផ្សារកណ្តាល ជាចំណុចកើតហេតុ។ ចៃដន្យ ត្រូវខ្សែភ្លើងឆក់បណ្តាលឲ្យ រងរបួសធ្ងន់ ពេលនោះត្រូវបានមិត្តភក្តិរួមការងារជួយដឹកទៅសង្រ្គោះភ្លាមៗ តែជាអកុសលត្រូវបានបាត់បង់ជីវិត ខណៈដឹកដល់មន្ទីរពេទ្យពេទ្យបង្អែកក្រុងប៉ោយប៉ែតបានតែបន្តិច ។
ក្រោយមកសាកសពជនរងគ្រោះត្រូវបានសាច់ញាតិរៀបចំធ្វើបុណ្យតាមប្រពៃណី ៕ ដោយ៖វណ្ណា
.
