សារព័ត៌មាន នគរវត្ត តែងតែនាំមុខគេជានិច្ច
មនុស្សម្នាក់ៗ មានភ័ព្វព្រេងវាសនាកើតមកមិនដូចគ្នាទេ អ្នកខ្លះកើតមកលើគំនរទ្រព្យសម្បត្តិ ហើយអ្នកខ្លះទៀតកើតមកជាកូនអ្នកក្រីក្រខ្វះមុខខ្វះក្រោយ បាយព្រឹកជាបាយល្ងាច ពេលខ្លះត្រូវទ្រាំដេកអត់ ទាំងពោះកំពុងតែកូរទៀតក៏មានដែរ។ តែវាសនាមិនបិទផ្លូវរបស់មនុស្សដែលខំប្រឹងតស៊ូនោះទេ ខ្វះអីអ្នកដែលជោគជ័យ មានទ្រព្យសម្បត្តិចាយមិនអស់ ហើយមានដើមកំណើតចេញពីគ្រួសារក្រីក្រលំបាកនោះ។ ប៉ុន្តែក្នុងនោះ អ្នកក៏ត្រូវតែដឹងផងដែរថា តើអ្នកដែលមានពិតប្រាកដ និងអ្នកមានតែតាមបណ្តាញសង្គមគឺមានភាពខុសប្លែកគ្នាបែបណា?
បើចង់ដឹងតោះទៅអានទាំងអស់គ្នា៖
១-អ្នកមានពិត
អ្នកដែលគេមានពិត គឺគេមិនដែលគិតថាខ្លួនគេមាននោះទេ។ ពោលគឺគេមិនចេះទៅដើរនិយាយអួតថាខ្លួនជាអ្នកមាន ចំណាយពេលអត់ប្រយោជន៍ទៅលើការបង្ហោះរបស់ទ្រព្យសម្បត្តិលើបណ្តាញសង្គម បង្អួតភ្នែកអ្នកដទៃនោះទេ។ គេក៏មិនមានទម្លាប់ពាក់មាសពេជ្រសម្ញែងរបស់ទ្រព្យប៉ុនកដៃកជើងនោះដែរ ហើយពេលទៅណាមកណាគឺរមែងខ្លាចគេដឹងថាខ្លួនជាអ្នកមាន។ ព្រោះថាអ្នកមានពិតគឺមិនមែនសំដៅតែទៅលើរបស់ទ្រព្យតែមួយមុខនោះទេ តែគឺភាពមានបានប្រកបដោយបញ្ញា ចេះគិតដឹងខុសត្រូវ អ្វីដែលគួរធ្វើនិងអ្វីដែលមិនគួរធ្វើ។ ឧទាហរណ៍ដូចជា លោកBill Gates, Mark Zuckerberg , Jack Ma សុទ្ធតែជាមហាសេដ្ឋីដែលមានលុយវាល់ពាន់លាន ដុល្លារលំដាបពិភពលោក តែមើលពីរបៀបរស់នៅគឺសាមញ្ញខ្លាំងបំផុត ខោអាវពាក់ដដែលៗ គ្មានអង្គរក្សការពារឆ្វេងស្តាំ បរិច្ចាគថវិកាជួយដល់ប្រជាជន និងប្រទេសក្រីក្រ ហើយក៏មិនផ្អើលអ្នកកាសែតទៅចុះផ្សាយដែរ។
២-អ្នកមានលើបណ្តាញសង្គម
គ្មានអ្វីដែលចម្លែកនោះឡើយ អ្នកដែលគេមានពិត គេមិនទៅគិតចង់អួតចង់ចាញ់ឈ្នះគ្នានៅលើបណ្តាញសង្គមនោះទេ គឺមានតែអ្នកអត់នោះទេដែលខំព្យាយាមសម្ញែងថតបង្ហោះបង្ហាញអ្នកដទៃឱ្យដឹងថាខ្លួនជាអ្នកមាន។ ដូចពាក្យថា«បុគ្គលណាដែលកាន់តែអួតថាខ្លួនជាមនុស្សឆ្លាត បុគ្គលនោះក៏កាន់តែល្ងង់ផងដែរ»។ ព្រោះថាសេចក្តីថ្លៃថ្នូររបស់មនុស្សមិនមែនអាស្រ័យលើគ្រឿងអលង្ការខាងក្រៅខ្លួនទាំងអស់នោះតែមួយមុខទេ។
យ៉ាងណាមិញ ចំណុចរៀបរាប់ខាងលើ គឺគ្រាន់តែជារឿងរ៉ាវ ដែលកើតឡើងហើយ ឆ្លុះបញ្ចាំងពីតថភាពនៃសង្គមរបស់យើង នាពេលបច្ចុប្បន្ននេះតែប៉ុណ្ណោះ។ ម្យ៉ាងទៀតការដែលថតបង្ហោះបង្អួតពីរបស់ទ្រព្យលើបណ្តាញសង្គមនេះ គឺមិនមានជាផលប្រយោជន៍អី្វ ក្រៅពីនាំគ្រោះថ្នាក់ដល់ខ្លួនឯង និងគ្រួសារតែប៉ុណ្ណោះ។ ដូច្នេះការរស់នៅបែបសាមញ្ញ ធម្មតា មិនសូវបង្ហាញ ទើបជាការរស់នៅប្រកបទៅដោយក្តីសុខ និងមានសុភមង្គលពិតប្រាកដ៕ ដោយ៖ស សម
