សារព័ត៌មាន នគរវត្ត តែងតែនាំមុខគេជានិច្ច
កណ្ដាល៖បុរសម្នាក់ស្លាប់បាត់បង់ជីវិតយ៉ាងអាណោចអាធ័ម ខណៈបើកម៉ូតូមិនប្រកាន់ស្ដាំ ជ្រុលទៅបុកជាមួយរថយន្តធុនធំពេញមួយទំហឹង នៅវេលាម៉ោង១០និង៣០នាទីព្រឹក ថ្ងៃទី១៧ ខែកក្កដា ឆ្នាំ២០២០ នៅលើកំណាត់ផ្លូវជាតិលេខ២១ ស្ថិតក្នុងភូមិផ្លូវបំបែក ឃុំទឹកវិល ស្រុកស្អាង ខេត្តកណ្តាល។
មន្ត្រីនគរបាលចរាចរណ៍ស្រុកស្អាងបានឲ្យដឹងថា ជនរងគ្រោះឈ្មោះ.ឡាំ វ៉ិច ភេទប្រុស អាយុ៥៣ឆ្នាំ មានទីលំនៅភូមិព្រែកថ្មី ឃុំទឹកវិល ស្រុកស្អាង ខេត្តកណ្ដាល មុខរបរលក់ដូរ ជាអ្នកបើកបរម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ កណ្តាល១R៦១៥១ ។ ចំណែកភាគីខាងរថយន្តម៉ាក(FUSO) ពណ៌ខៀវ ពាក់ស្លាកលេខ កំពង់ស្ពឺ ៣A១៧៨៧ អ្នកបើកបរមិនស្គាល់អត្តសញ្ញាណ (រត់គេចខ្លួនបាត់ស្រមោល។
ប្រភពដដែលបន្តថា នៅថ្ងៃទីខែឆ្នាំកើតហេតុគេបានឃើញជនរងគ្រោះបើកបរម៉ូតូតាមបណ្ដោយផ្លូវជាតិលេខ២១ ក្នុងទិសដៅពីត្បូងទៅជើង(ជ្រៃធំ -តាខ្មៅ)លុះបើកមកដល់ចំណុចកើតហេតុក៏បានបើករេចង្កូតមកឆ្វេង(មិនប្រកាន់ស្ដាំ) ក៏បានបុកជាមួយរថយន្តខាងលើម៉ាកFUSO ដែលកំពុងបើកបរបញ្ច្រាស់ទិសគ្នា (ពីជើងទៅត្បូង តាខ្មៅ-ជ្រៃធំ)បណ្តាលអោយដួលបោកក្បាលទៅនឹងផ្លូវស្លាប់តែម្តង។ចំណែកអ្នកបើកបររថយន្ដបានទុករថយន្តចោលរួចរត់គេចខ្លួនបាត់ស្រមោល។
បន្ទាប់ពីបានទទួលព័ត៌មាននេះភ្លាម សមត្ថកិច្ចបានចុះទៅដល់កន្លែងកើតហេតុ ហើយធ្វើការវាស់វែងរួចសន្និដ្ឋានថា ករណីខាងលើនេះ គឺបណ្ដាលមកពីអ្នកបើកបរម៉ូតូបើកបរដោយមានការធ្វេសប្រហែស ខ្វះការប្រុងប្រយ័ត្ន (មិនប្រកាន់ស្តាំ)ទើបបណ្តាលអោយមានគ្រោះថ្នាក់កើតឡើង ។ចំណែកឯរថយន្ដ បើកបរខ្វះការប្រុងប្រយ័ត្ន។
បច្ចុប្បន្ន មធ្យោបាយពាក់ព័ន្ធទាំង២គ្រឿង ត្រូវបាននគរបាលជំនាញយកមករក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់។ ចំណែកសាកសពសមត្ថកិច្ចបានប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕ ស្អាង ជ័យ
