សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ក្រុមហ៊ុនហួវៃបានរំសាយបុគ្គលិកជាង៧០ភាគរយនៅឥណ្ឌា ហើយប្រាក់ចំណូលរបស់ក្រុមហ៊ុន ក៏បានធ្លាក់ចុះនៅលើទីផ្សារឥណ្ឌាផងដែរ គឺធ្លាក់រហូតដល់៥០ភាគរយ។
តាមសារព័ត៌មាន Financial Times គិតមកដល់ចុងឆ្នាំ២០១៩ ក្រុមហ៊ុនហួវៃបានកំណត់គោលដៅ ទទួលបានប្រាក់ចំណូលពី៧០០-៨០០លានដុល្លារអាមេរិក ក្នុងទីផ្សារឥណ្ឌាឆ្នាំ២០២០ គឺតិចជាងកាលពីឆ្នាំ២០១៧ ដែលមាន ប្រាក់ចំណូលដល់ទៅ១,២ពាន់លានដុល្លារអាមេរិក។ ប៉ុន្តែពេលនេះ ក្រុមហ៊ុន បានកែប្រាក់ចំណូលនៅសល់តែ ៣៥០-៥០០ លានដុល្លារតែប៉ុណ្ណោះ ។
នៅពេលនេះក្រុមហ៊ុនចិនបានផ្អាករាល់គម្រោងពង្រីកអាជីវកម្មរបស់ខ្លួននៅក្នុងប្រទេសឥណ្ឌា ។
ទន្ទឹមនឹងនេះក្រុមហ៊ុនបានកាត់បន្ថយ បុគ្គលិកឥណ្ឌាដល់ទៅ៧០ភាគរយ ដោយរក្សាទុកតែបុគ្គលិកស្រាវជ្រាវ និងអភិវឌ្ឍន៍សេវាកម្មតែប៉ុណ្ណោះ។
ការប្រឈមមុខតានតឹងដាក់គ្នារវាងឥណ្ឌានឹងចិនកាន់តែខ្លាំងឡើងក្រោយពេលកម្លាំងទាហានឥណ្ឌា និងចិនប៉ះទង្គិចគ្នានៅតំបន់ព្រំដែនមានវិវាទ បណ្តាលឲ្យទាហានឥណ្ឌា២០នាក់ស្លាប់។ តាំងពីពេលនោះមក ពលរដ្ឋឥណ្ឌាបានធ្វើបាតុកម្មប្រឆាំងចិន ហើយនាំគ្នាឈប់ប្រើប្រាស់ផលិតផលរបស់ចិន តែម្តង ។ ទាំងនោះហើយធ្វើឲ្យក្រុមហ៊ុនចិនរកស៊ីនៅឥណ្ឌា ប្រឈមនឹងបញ្ហាជាច្រើន៕ដោយ៖ធី រីណា
