សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ មន្ត្រីសន្តិសុខ លីបង់ ឧត្តមសេនីយ៍Abbas Ibrahim បានបញ្ជាក់ថា មានសារធាតុ ammonium nitrate ដល់ទៅ២៧០០តោន នៅក្នុងឃ្លាំងស្ថិតនៅកំពង់ផែBeirut បានផ្ទុះ កាលពីថ្ងៃទី៤ខែសីហា។ កម្លាំងផ្ទុះត្រូវបានគេវាយតម្លៃថា ស្មើរំសេវTNT ដល់ទៅ២៤០ តោន ហើយអ្នកនៅចម្ងាយដល់ទៅ១៨០ គីឡូម៉ែត្រក៏ឮស៊ូសំឡេងផ្ទុះផងដែរ។
លោក ឧត្តមសេនីយ៍Abbas Ibrahim បានបញ្ជាក់ថា សារធាតុ ammonium nitrate ត្រៀមដឹកជញ្ជូនទៅកាន់អាហ្វ្រិក ក៏បានផ្ទុះកាលពីរសៀលថ្ងៃទី៤ខែសីហា ។ សារធាតុខាងលើគឺសម្រាប់ផលិតរំសេវផ្ទុះ ។
ប្រធានាធិបតីលីបង់ លោកMichel Aoun បានបញ្ជាក់ថា នឹងដាក់ទណ្ឌកម្ម ទៅលើអ្នកដែលទទួលខុសត្រូវ។ ប្រធានាធិបតីបញ្ជាក់ថា សារធាតុ ammonium nitrate ២៧០០តោន គឺបានរក្សានៅក្នុងឃ្លាំង រយៈពេល៦ឆ្នាំមកហើយ ដោយមិនមានវិធានការសុវត្ថិភាពនោះឡើយ។
បណ្តាមេដឹកនាំជុំវិញពិភពលោកបានលើកឡើងពីទស្សនរបស់ខ្លួនជុំវិញការផ្ទុះនៅលីបង់ដោយចាត់ទុកថាជាការផ្ទុះទ្រង់ទ្រាយធំបំផុតមិនធ្លាប់មាន បន្ទាប់ពីគ្រាប់បែកបរមាណូ ដែលអាមេរិក ទម្លាក់នៅទីក្រុង ហ៊ីរ៉ូស៊ីម៉ានិងណាហ្គាសាគី នាថ្ងៃទី៦និងទី៩ ខែសីហា ឆ្នាំ១៩៤៥។
ប្រធានាធិបតីអាមេរិក ដូណាល់ ត្រាំ បានលើកឡើងថាការផ្ទុះនៅទីក្រុង Beirut ដូចជាគ្រាប់បែក។ លោកត្រាំបញ្ជាក់ថាអាមេរិកនិងជួយដល់ពលរដ្ឋលីបង់ ក្រោយការផ្ទុះយ៉ាងអាក្រក់នេះ។
ជាមួយគ្នានេះប្រធានាធិបតីរុស្ស៊ី លោក ពូទីន បានបញ្ជាក់ថា «រុស្ស៊ីចូលរួមរំលែកការឈឺចាប់ជាមួយពលរដ្ឋលីបង់ ក្រោយការផ្ទុះដ៏រន្ធត់នោះ«។
ចំណែកអធិការបតីអាល្លឺម៉ង់ លោកស្រីAngela Merkel បានចូលរួមរំលែកទុក្ខដល់ពលរដ្ឋលីបង់ និងស្នើទៅជួយដល់ពលរដ្ឋលីបង់ពេលជួបទុក្ខលំបាកនេះ។ ជាមួយគ្នានោះដែរប្រធានាធិបតីបារាំងប្រកាសថានឹងជួយដល់លីបង់តាមសំណើររបស់រដ្ឋាភិបាលលីបង់។
ដោយឡែកនាយករដ្ឋមន្ត្រីអូស្ត្រាលី លោក Scott Morrison ក៏បានចូលរួមរំលែកទុកផងដែរ ហើយអូស្ត្រាលីនឹងទៅជួយដល់លីបង់។ លោកScott Morrisonបានចាត់ទុកថាជាការផ្ទុះ អាក្រក់បំផុតមិនធ្លាប់មាន៕ដោយ៖ធី រីណា
