សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អគ្គនាយករង នៃអគ្គនាយកដ្ឋានកសិកម្មលោក ម៉ាក់ សឿន បានថ្លែងកាលពីថ្មីៗនេះ នៅក្នុងពិធី ថា គ្រោះរាំងស្ងួត កំពុងគំរាមកំហែងដល់ដំណាំដំឡូងមី ប្រមាណ ១.៤ម៉ឺនហិកតា របស់ប្រជាកសិករនៅក្នុងខេត្តបន្ទាយមានជ័យ ។ បន្ថែមពីនេះលោកអគ្គនាយករង បានបញ្ជាក់ថា ដំឡូងមីដំណាំស្រូវ ប្រមាណ៨ម៉ឺនហិកតា នៅក្នុងខេត្តបន្ទាយមានជ័យ ក៏កំពុងតែប្រឈមនឹងការខូតខាតដែរ ដោយសារគ្រោះរាំងស្ងួត។
ចំណែកលោក ប៉ាង វណ្ណាសេដ្ឋ ប្រធានមន្ទីកសិកម្មខេត្តបន្ទាយមានជ័យបានឲ្យដឹងដែរថា៖ «គិតមកដល់ថ្ងៃនេះទាំងដំណាំស្រូវអាចសង្គ្រោះបានច្រើនហើយ និងដំណាំដំឡូងមី បានសង្គ្រោះ ស្ទើ ១០០ភាគរយដោយសារទឹកភ្លៀង នៅសល់បរិមាណតិចតួចប៉ុណ្ណោះ»។ទោះបីមិនបញ្ជាក់ពីតួលេខតែលោកប្រធានមន្ទីរបានបញ្ជាក់ថា គ្មានអ្វីជាការបារម្ភទៀតនោះទេ។
បើយោងតាមរបាយការណ៍ប្រចាំខែកក្កដា របស់ក្រសួងកសិកម្ម ចំពោះការងារបង្កបង្កើនផលស្រូវវស្សាទូទាំងប្រទេស បានជាង២.២លានហិកតាស្មើនឹងជិត៩០ភាគរយ។ ក្នុងនោះគ្រោះរាំងគ្រោះបានធ្វើឲ្យស្រូវ ជាង ១០ម៉ឺនហិកតា នៅក្នុងខេត្តចំនួន៩ បានរងផលប៉ះពាល់ និងប្រមាណ ៣ពាន់ហិកតា បានខូចខាត។ ដោយក្រសួងកសិកម្ម រុក្ខាប្រមាញ់ និងនេសាទ បានគោលការណ៍ថា នៅត្រឹមឆ្នាំ២០៣០ នឹងប្រែក្លាយការធ្វើកសិកម្មនៅកម្ពុជាទៅជាកសិកម្មទំនើប ដោយជំរុញការស្រាវជ្រាវ និងការផ្សព្វផ្សាយ និងការអនុវត្តបច្ចេកទេស ដែលធន់នឹងការប្រែប្រួលអាកាសធាតុ។
លោក ម៉ាក់ សឿន អគ្គនាយករងបន្តថា បើគិតត្រឹមថ្ងៃទី១២ ខែសីហាកន្លងទៅថ្មីៗនេះ មានស្រូវតែជាង៦ពាន់ប៉ុណ្ណោះ ត្រូវបានជួយសង្គ្រោះ។ ប៉ុន្តែដំណាំស្រូវនៅខេត្តបន្ទាយមានជ័យ និងព្រៃវែងប៉ះពាល់ច្រើនជាងគេដោយសាររាំងស្ងួត។ ទោះជាយ៉ាងនេះក្តី ស្រូវដែលប៉ះពាល់នៅខេត្តព្រៃវែងចំនួន ១៨ពាន់ហិកតា នោះត្រូវបានសង្គ្រោះទាំងស្រុងហើយ។
លោក ម៉ាក់ សឿន គូសបញ្ជាក់ទៀតថា ការផលិតបន្លែនៅប្រទេសកម្ពុជាអំឡុងវិបត្តិកូវីដ-១៩ ក្រសួងកសិកម្ម បានជំរុញ និងបង្កើនការដាំដុះការចិញ្ចឹមសត្វ ក្នុងស្រុក ដើម្បីកាត់បន្ថយការនាំចូល និងរក្សាស្ថិរភាពសេដ្ឋកិច្ចគ្រួសារ។ ប៉ុន្តែទោះបីជាយ៉ាងណា ក៏ប្រទេសកម្ពុជានៅតែនាំចូលបន្លែមួយចំនួន ដែលខ្លួនមិនទាន់អាចផលិតបានគ្រប់គ្រាប់នោះដែរ មានដូចជា៖ស្ពៃក្ដោប ការ៉ុត និងបន្លែតាមរដូវមួយចំនួនទៀត ៕ដោយ៖សហការី
