សាហាវព្រៃផ្សៃម្លេះ ! លោកឧកញ៉ា ភិរម្យ វិចិត្រដារ៉ា រងការចោទប្រកាន់ ថា បានបោកទូរស័ព្ទនិងវៃមនុស្សស្រីដូចសត្វធាតុ

ខេត្តព្រះសីហនុ៖ លោកឧកញ៉ា ភិរម្យ វិចិត្រដារ៉ា អគ្គនាយកក្លិបពាណិជ្ជករកម្ពុជា ជាម្ចាស់ក្រុមហ៊ុន WorldWide Dental Supply ជាម្ចាស់ក្រុមហ៊ុន One World Trading ជាម្ចាស់ហាងបញ្ចាំ សុវណ្ណវិចិត្រ ហ្វាយណែន ជាប្រធានក្រុមហ៊ុន ECC Realty និង ជាម្ចាស់គម្រោងអចលនទ្រព្យខេត្តសៀមរាប ខេត្តកំពង់ស្ពឺ ខេត្តកំពតផងនោះ បានរងការចោទប្រកាន់ថា បានបោកទូរស័ព្ទនិងវ៉ៃមនុស្សស្រីយ៉ាងព្រៃផ្សៃបំផុត ប្រៀបបានប្រទេសគ្មានច្បាប់ ។ ប៉ុន្តែ លោកឧកញ៉ាបានបដិសេធការចោទប្រកាន់នេះ ។

សូមរំលឹកថា ហេតុការណ៍នៃអំពើហិង្សានេះ គឺបានកើតឡើងកាលពីវេលាម៉ោង២១៖៣០នាទីយប់ ថ្ងៃទី២០ ខែសីហា ឆ្នាំ២០២០ នៅចំណុចហាងមួយកន្លែងឈ្មោះ «ឡា វ៉ូត» ស្ថិតនៅសង្កាត់លេខ៤ ក្រុងព្រះសីហនុ ខេត្តព្រះសីហនុ ។

យោងតាមពាក្យបណ្តឹង ចុះថ្ងៃទី២១ ខែសីហា ឆ្នាំ២០២០ ដែលអង្គភាព «នគរដ្រេហ្គន» ទើបទទួលបាននៅថ្ងៃទី២៤ ខែសីហា ឆ្នាំ២០២០នេះបញ្ជាក់ថា ជនរងគ្រោះឈ្មោះ គឹម ចាន់សុធី ភេទស្រី អាយុ២៧ឆ្នាំ បានរៀបរាប់ថា កាលពីថ្ងៃទី១៩ ខែសីហា ឆ្នាំ២០២០ បងស្រីរបស់ជនរងគ្រោះឈ្មោះ គឹម ចាន់សុធា បានមកពីភ្នំពេញ មកលេងនៅខេត្តព្រះសីហនុ ។ 

នៅយប់ថ្ងៃទី២០ ខែសីហា ឆ្នាំ២០២០ ពួកគេមានគ្នា៤នាក់ មានប្រុស២នាក់ បាននាំគ្នាទៅហូបអាហារនៅហាង ឡា វ៉ូត ។ ពេលនោះបានឃើញឈ្មោះ យ៉េន ម៉ារ៉ាណង ភេទស្រី បានមកជាមួយបងប្អូនរបស់គាត់មកហូបអាហារនៅហាងនេះដែរ ។ ខណៈនោះ បងស្រីជនរងគ្រោះបានបង្ហួសទៅសួរនាំឈ្មោះ យ៉េន ម៉ារ៉ាណង ស្រាប់តែឈ្មោះ យ៉េន ម៉ារ៉ាលាង បានស្រែកជេរបងស្រីជនរងគ្រោះ ។

ដោយឃើញហេតុការណ៍មិនស្រួល ជនរងគ្រោះបានលើកទូរស័ព្ទរកថតសកម្មភាពនេះ ស្រាប់តែមានមនុស្សប្រុសម្នាក់ (លោកឧកញ៉ា ភិរម្យ វិចិត្រដារ៉ា) ត្រូវជាបងប្អូនជីដូនមួយជាមួយឈ្មោះ យ៉េន ម៉ារ៉ាណង បានស្ទុះមកទាញទូរស័ព្ទរបស់ជនរងគ្រោះម៉ាក សាំងសុង យកទៅបោកកម្ទេចចោលនិងវ៉ៃជនរងគ្រោះ តែម្តង ។ ក្រោយបង្កហេតុ លោកឧកញ៉ា ភិរម្យ វិចិត្រដារ៉ា បានរត់គេចខ្លួនបាត់ស្រមោល ។

ជុំវិញបញ្ហានេះ ជនរងគ្រោះឈ្មោះ គឹម ចាន់សុធី បានថ្លែងប្រាប់បន្ថែមនៅថ្ងៃទី២៤ ខែសីហា ឆ្នាំ២០២០នេះថា រហូតមកទល់ពេលនេះ អ្នកនាងពុំទាន់ទទួលបានយុត្តិធម៌នៅឡើយទេ ដោយសារភាគីជនបង្ក បានមកសម្របសម្រួល តែអ្នកនាងពុំព្រម ព្រោះចង់ឱ្យច្បាប់ចាត់ការរឿងនេះ ។ 

ឆ្លើយតបចំពោះការចោទប្រកាន់នេះវិញ លោកឧកញ៉ា ភិរម្យ វិចិត្រដារ៉ា ថ្លែងប្រាប់ ថា លោកមិនបានប្រព្រឹត្តអំពើហិង្សាលើជនរងគ្រោះ ដូចការចោទប្រកាន់នោះទេ ។ លោកថ្លែងថា លោកបានត្រៀមមេធាវី រួចរាល់ហើយ ដើម្បីតតាំងករណីនេះ ។

ប្រជាពលរដ្ឋរិះគន់ថា ខ្លួនមានទ្រព្យសម្បត្តិ មានមុខមាត់ក្នុងសង្គម បែរជា លោកឧកញ៉ា ភិរម្យ វិចិត្រដារ៉ា មានចរិតជាមនុស្សគ្មានសីលធម៌ វ៉ៃមនុស្សស្រី ធ្វើតែប្រទេសគ្មានច្បាប់។ សូមឱ្យសមត្ថកិច្ចមានវិធានការក្នុងរឿងនេះផង ខណៈនៅតែជាបទល្មើសជាក់ស្តែងនៅឡើយ៕

ដោយ៖ចេស្តា