សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលរបស់ប្រធានាធិបតី ដូណាល់ ត្រាំ កាលពីថ្ងៃទី២ខែកញ្ញា បានប្រកាសថា ខ្លួននឹងមិនសងប្រាក់ជាង៦០លានដុល្លារដល់អង្គការសុខភាពពិភពលោក (WHO) ដែលអាមេរិកជំពាក់នោះឡើយ។ ប៉ុន្តែប្រាក់ទាំងនោះបានផ្តល់ជូនអង្គការសហប្រជាជាតិទៅវិញ។
ការប្រកាសមិនសងប្រាក់ដល់(WHO) កើតឡើងក្រោយពេលមួយថ្ងៃដែលអាមេរិកមិនចូលរួមជាមួយគម្រោងអភិវឌ្ឍន៍វ៉ាក់សាំងប្រឆាំងកូវីដ-១៩ដឹកនាំដោយអង្គការសុខភាពពិភពលោក។
អាមេរិកបានសម្រេចមិនសងប្រាក់ ៦២លានដុល្លារដែលអាមេរិកជំពាក់ (WHO) ក្នុងឆ្នាំ២០២០នោះឡើយ ក្រោយពេលលោកត្រាំចោទប្រកាន់ អង្គការនេះថាទទួលឥទ្ធិពលពីប្រទេសចិន ដើរតាមអ្វីដែលចិនចង្អុលបង្ហាញ។ ទាំងនោះហើយទើបលោកត្រាំសម្រេចដកអាមេរិកចេញពីអង្គការនេះ។ នៅពេលនះអាមេរិកបានដំណើរការដកខ្លួនចេញពីអង្គការសុខភាពពិភពលោក ហើយ ហើយនៅខែកក្កដាឆ្នាំ២០២១ អាមេរិកនឹងចាកចេញជាផ្លូវការ។
ប៉ុន្តែការចាកចេញពីអង្គការសុខភាពពិភពលោករបស់អាមេរិកអាចនឹងត្រូវផ្លាស់ប្តូរប្រសិនបើការបោះឆ្នោតនៅថ្ងៃទី៣ ខែវិច្ឆិកា ឆ្នាំ២០២០ ខាងមុខមានការប្រែប្រួល ផ្លាស់ប្តូរមេដឹកនាំនោះ។
កន្លងមកបេក្ខភាពប្រធានាធិបតីមកពីគណបក្សប្រជាធិបតេយ្យ លោក ចូ បៃឌិន បានបញ្ជាក់ថា ប្រសិនបើលោកជាប់ឆ្នោតជាប្រធានាធិបតីនោះលោកនឹងមិនដកអាមេរិកចេញពីអង្គការសុខភាពពិភពលោកឡើយ៕ដោយ៖ធី រីណា
