សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី៧ ខែកញ្ញានៅទូទាំងប្រទេសវៀតណាមមានអ្នកជំងឺកូវីដ១៩ ចំនួន២៣នាក់បានព្យាបាលជាសះស្បើយ ។ ក្នុងចំណោមអ្នកជំងឺដែលព្យាបាលជាសះស្បើយ មាន១៩នាក់នៅខេត្តក្វាងណាម និង ៤នាក់នៅខេត្តដាណាង។
គណៈកម្មការប្រយុទ្ធប្រឆាំងជំងឺឆ្លង កូវីដ-១៩ បានឲ្យដឹងថា មកទល់ពេលនេះវៀតណាមមានអ្នកឆ្លងកូវីដ-១៩ សរុប ១០៤៩នាក់។ ចំណែកអ្នកព្យាបាលជាសះស្បើយមានដល់ទៅ៨៥៣នាក់ ។
ចំណែកអ្នកឆ្លងកូវីដ-១៩ នៅថ្ងៃទី ៧ខែកញ្ញា មិនមានឡើយ ។ ជាមួយគ្នានេះខេត្តជាច្រើននៅក្នុងប្រទេសវៀតណាមបានអនុញ្ញាតឲ្យបើកទ្វារក្លិបកម្សាន្ត ហាង ខារ៉ាអូខេ ម៉ាស្សា…ជាដើម។
ចំណែកអ្នកឆ្លងកូវីដ-១៩ នៅលើពិភពលោកវិញ គិតមកដល់ថ្ងៃទី៧ខែកញ្ញា ចំនួនអ្នកឆ្លងលើផែនដីកើនលើស ២៧.៣លាននាក់, ស្លាប់ជិត ៩០ម៉ឺននាក់, ជាសះស្បើយជាង ១៩.៣លាននាក់។
ជាមួយគ្នានេះដែរ ចិននិងរុស្ស៊ី ក៏ដូចជាអាមេរិក បានខិតខំផលិតវ៉ាក់សាំងប្រឆាំងកូវីដ-១៩ ឲ្យបានឆាប់បំផុត។ រុស្ស៊ីនិងចិន បានសាកល្បងជាលើកចុងក្រោយហើយនឹងចាក់បង្ការដល់ពលរដ្ឋក្នុងពេលឆាប់ៗខាងមុខ ៕ដោយ៖ធី រីណា
