សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើយោងតាមរបាយការណ៍របស់ទីភ្នាក់ងារបរិស្ថានអឺរ៉ុប(EEA) នៅថ្ងៃទី៧ ខែកញ្ញា បានបង្ហាញថា៖ មនុស្សម្នាក់ក្នុងចំណោម៨នាក់(ឬ១៣ភាគរយ)ស្លាប់ដោយមានការពាក់ព័ន្ធទៅនឹងការបំពុលបរិស្ថាន។ របាយការណ៍ដដែរនេះ ក៏បានទាញចំណាប់អារម្មណ៍ឲ្យយកចិត្តទុកដាក់ពីកត្តាសុខភាព និងបរិស្ថាន ក្នុងពេលមានជំងឺឆ្លងរាតត្បាតCOVID-19ផងដែរ។
របាយការណ៍របស់ទីភ្នាក់ងារបរិស្ថានអឺរ៉ុប បានចង្អុលបញ្ជាក់ថា ការលេចចេញវត្តមាន នៃមេរោគដែលចម្លងជំងឺពីសត្វទៅមនុស្ស(Zoonosis) មានការជាប់ពាក់ព័ន្ធនៅនឹងការខូចរិចរិលបរិស្ថាន និងសកម្មភាពរបស់មនុស្សជាមួយសត្វនៅក្នុងប្រព័ន្ធចំណីអាហារ។
របាយការណ៍នេះ បានគូសបញ្ជាក់ថា បច្ចុប្បន្នប្រជាជនរស់នៅក្នុងសហភាពអឺរ៉ុប ប្រឈមមុខជាប្រចាំទៅនឹងគ្រោះបំពុលបរិស្ថានដូចជាខ្យល់បំពុលសម្លេង និងសារធាតុគីមី។ចំណែកឯ ការផ្ទុះឡើងនៃជំងឺCOVID-19 ត្រូវបានរបាយការណ៍នេះទាញយកជាឧទាហរណ៍នៃការពាក់ព័ន្ធគ្នារវាងសុខភាពមនុស្ស និងសុខភាពប្រព័ន្ធអេកូឡូស៊ី។
យោងតាមទិន្ន័យចុងក្រោយដែលទីភ្នាក់ងារបរិស្ថានអឺរ៉ុបមានត្រឹមឆ្នាំ២០១២ ក្នុងចំណោមប្រទេសទាំង២៧ ក្នុងសហភាពអឺរ៉ុប រួមទាំងចក្រភពអង់គ្លេសផងដែរ អ្នកស្លាប់ចំនួន៦សែន៣ម៉ឺននាក់មានការជាប់ពាក់ព័ន្ធទៅនឹងកត្តាបំពុលបរិស្ថាន ។
របាយការណ៍ខាងលើ ក៏បង្ហាញផងដែរពីភាពខុសគ្នានៃផលប៉ះពាល់បរិស្ថានទៅលើជីវិតមនុស្ស នៅតាមប្រទេសនីមួយៗ។ គេកត់សម្គាល់ឃើញថា ចំនួនអ្នកស្លាប់ដោយសារបរិស្ថាននៅអឺរ៉ុបខាងលិច មានចំនួនតិចជាងនៅអឺរ៉ុបខាងកើត ដែលវិស័យថាមពលរបស់បណ្តារប្រទេសទាំងនោះអាស្រ័យខ្លាំងទៅលើហ្វូស៊ីលឥន្ធនៈដូចជាធ្បូងថ្មជាដើម។
ជាក់ស្តែង រ៉ូម៉ានីដែលជាប្រទេសស្ថិតនៅខាងកើត មានចំនួនអ្នកស្លាប់ដោយសារកត្តាបរិស្ថានដល់ទៅ២០ភាគរយ ធៀបទៅនឹងស៊ុយអែតដែលមានត្រឹមតែ១០ភាគរយប៉ុណ្ណោះ។ ចំណែកការបំពុលបរិស្ថានត្រូវចាត់ទុកថាមានការពាក់ព័ន្ធយ៉ាងចម្បងទៅនឹងជំងឺមហារីក ជំងឺបេះដូង និងជំងឺផ្លូវដង្ហើម។ភ្នាក់ងារបរិស្ថានបានសង្កត់ធ្ងន់ថា ករណីស្លាប់ទាំងនោះអាចជៀសវាងបានតាមរយៈការកាត់បន្ថយគ្រោះថ្នាក់ដែលបណ្តាលមកពីការបំពុលបរិស្ថាន។
យោងតាមទីភ្នាក់ងារបរិស្ថាន គេអាចលើកកម្ពស់សុខភាព និងបរិស្ថាននៅអឺរ៉ុប បានតាមរយៈការបង្កើតតំបន់បៃតង និងខៀវ ដែលរួមបញ្ចូលដើមឈើនិងទឹក ដើម្បីកាត់បន្ថយកម្តៅនៅក្នុងទីក្រុង គ្រោះទឹកជំនន់ ការរំខានដោយសម្លេង និងគាំទ្រជីវចម្រុះក្នុងទីក្រុង។
គួរបញ្ជាក់ថា ក្រៅតែពីនេះ គេអាចបង្កើតតំបន់សាធារណៈដែលមានដើមឈើក្នុងទីក្រុង ដើម្បីអាចសម្រាក និងហាត់ប្រាណ ដែលជម្រុញសកម្មភាពបែបសហគម ដែលអាចកាត់បន្ថយការរស់នៅតែឯកឯង។ បន្ថែមពីនេះ គេក៏គួរកាត់បន្ថយការធ្វើដំណើរ កាត់បន្ថយការបរិភោគសាច់ និងលែងផ្តល់ការឧបត្តម្ភធនដល់ឧស្សាហកម្មដែលប្រើប្រាស់ហ្វូស៊ីលឥន្ធនៈ៕
ដោយ៖ស តារា
