សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្តលឿនដូចហោះទៅដល់ផ្លូវបែកជា៤ ក៏ជ្រុលទៅបុករថយន្តសាំយ៉ុងយ៉ាងពេញទំហឹង បណ្តាលឲ្យរថយន្តក្រឡាប់ផ្ងារជើង និងរងរបួសមនុស្ស៣នាក់ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យ។
ហេតុការណ៍នេះបានកើតឡើងនៅម៉ោង ២ និង៣០ នាទីរំលងអធ្រាត្រឈានចូលថ្ងៃទី១០ ខែកញ្ញា ឆ្នាំ ២០២០នៅតាមបណ្តោយផ្លូវលេខ២៥៣កែងនឹងផ្លូវលេខ២០២ត្រង់ចំណុចមុខសាលារៀនទឹកល្អក់ ក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុគាត់បានឃើញរថយន្តម៉ាកសាំយ៉ុង ពណ៌សពាក់ស្លាកលេខ កំពត 2B-0808 រួមដំណើរគ្នា៨នាក់បើកបរក្នុងទិសដៅពីត្បូងទៅជើងតាមបណ្តោយផ្លូវលេខ២៥៣ ខណៈមកដល់ចំណុចកើតហេតុដែលជាផ្លូវបំបែកជា៤ ស្រាប់តែឃើញរថយន្តម៉ាកតូយ៉ូតា RAV 4 ពណ៌ ទឹកប្រាក់ពាក់ស្លាក ភ្នំពេញ 2BC-3977 បើកបរម្នាក់ឯងតាមផ្លូវលេខ២០២ ក្នុងទិសដៅពីកើតទៅលិច បានជ្រុលទៅបុករថយន្តសាំយ៉ុងពេញទំហឹងបណ្តាលឲ្យរថយន្តសាំយ៉ុងក្រឡាប់ផ្ងារជើង និងរងរបួសអ្នកជិះធ្ងន់ស្រាល៣នាក់ ចំណែកឯរថយន្តបង្កបានឆ្លងចរន្តឆេះ តែត្រូវបានបងប្អូនប្រជាពលរដ្ឋជួយយកបំពង់អគ្គិភ័យបាញ់ពន្លត់ទាន់ពេល ។
បន្ទាប់ពីកើតហេតុ សមត្ថកិច្ចមូលដ្ឋាន បានចុះមកដល់កន្លែងកើតហេតុហើយបានទំនាក់ទំនងទៅសមត្ថកិច្ចជំនាញចរាចរណ៍មកវាស់វែងយករថយន្តទាំង២គ្រឿងនេះទៅរក្សាទុកនៅការិយាល័យចរាចរណ៍ផ្លូវគោកផ្លូវរង់ចាំដោះស្រាយគ្នានៅពេលក្រោយ៕ ដោយ៖ ជ្រោយពេជ្រ
