សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖នៅថ្ងៃទី១២ ខែកញ្ញា ប្រទេសបារ៉ែន បានដើរតាមប្រទេសអារ៉ាប់រួម(UAE) ដោយបង្កើនទំនាក់ទំនង ជាមួយអុីស្រាអែល។ សកម្មភាពខាងលើបង្កក្តីបារម្ភយ៉ាងខ្លាំងសម្រាប់ប្រទេសអុីរ៉ង់ ក្រោយប្រទេសសម្បូរប្រេងនៅតំបន់អារ៉ាប់បង្កើនទំនាក់ទំនងជាមួយអុីស្រាអែល ដើម្បីប្រឆាំងអុីរ៉ង់។
នៅលើបណ្តាញសង្គម Twitter ប្រធានាធិបតីអាមេរិកដូណាល់ ត្រាំ បានឲ្យដឹងថា លោកបានទូរស័ព្ទជាមួយព្រះមហាក្សត្រប្រទេស បារ៉ែន ព្រះចៅ Hamad bin Isa Al Khalifa និងនាយករដ្ឋមន្ត្រីអុីស្រាអែលលោកណេតាន់ យ៉ាហ៊ូ ស្តីពីការធ្វើឲ្យប្រសើរឡើងនូវទំនាក់ទំនងរវាងប្រទេសទាំងពីរ ។
លោកត្រាំបានប្រកាសទៅកាន់ក្រុមអ្នកសារព័ត៌មានថា «នេះពិតជាពេលវេលាប្រវត្តិសាស្ត្រ សម្រាប់ប្រទេសតំបន់អារ៉ាប់និងអុីស្រាអែល ក្នុងការធ្វើឲ្យប្រសើរឡើងនូវទំនាក់ទំនង ។ លោកត្រាំសង្ឃឹមថា នឹងមានប្រទេសជាច្រើនទៀតក្នុងពិភពអារ៉ាប់បង្កើនទំនាក់ទំនងជាមួយអុីស្រាអែល។
នៅក្នុងសេចក្តីប្រកាសរួមរវាងអុីស្រាអែល និងបារ៉ែន ប្រទេសទាំងពីរ បានបង្កើនទំនាក់ទំនងទ្វេភាគីដោយផ្ទាល់ដើម្បីការរីកចម្រើន ស្ថិរភាពនិងសន្តិសុខ ។
ក្រោយពេលទំនាក់ទំនង អុីស្រាអែល និងប្រទេសតំបន់អារ៉ាប់ល្អប្រសើរ អុីរ៉ង់កាន់តែបារម្ភ ដោយសម្ពន្ធមិត្តអុីស្រាអែលកាន់តែច្រើនឡើង នឹងធ្វើឲ្យអុីរ៉ង់ត្រូវឡោមព័ទ្ធដោយប្រទេសក្នុងតំបន់អារ៉ាប់៕ដោយ៖ធី រីណា
