សារព័ត៌មាន នគរវត្ត តែងតែនាំមុខគេជានិច្ច
ខ្សែប្រយុទ្ធ Lionel Messi របស់ក្រុម Barcelona បានឈរនៅលើគេក្នុងបញ្ជីរបស់ទស្សនាវដ្តី Forbes សម្រាប់កីឡាករបាល់ទាត់ដែលរកចំណូលបានខ្ពស់បំផុតនៅឆ្នាំ២០២០ ។
ទស្សនាវដ្តី Forbes បានប៉ាន់ប្រមាណថា ប្រាក់ចំណូលប្រចាំឆ្នាំរបស់ Messi គឺ១២៦លានដុល្លារ (៩៧,២លានផោន) ខណៈដែលខ្សែប្រយុទ្ធ Cristiano Ronaldo របស់ក្លិប Juventus ទទួលបាន១១៧លានដុល្លារ (៩០,៣លានផោន) ។ Neymar ស្ថិតនៅលេខ៣ និងមិត្តរួមក្រុម Paris St-Germain គឺ Kylian Mbappe ឈរលំដាប់លេខ៤ ។
កីឡាករ៣នាក់របស់ Premier League គឺខ្សែប្រយុទ្ធ Mohamed Salah, ខ្សែបម្រើ Paul Pogba និងអ្នកចាំទី David de Gea បានជាប់ចំណាត់ថ្នាក់ក្នុងចំណោម១០នាក់ ដូចគ្នានឹងក្លិប Real Madrid ក៏មានខ្សែប្រយុទ្ធ Gareth Bale មួយរូបផងដែរ។
កីឡាករសញ្ជាតិវែល Bale បានឈរនៅចំណាត់ថ្នាក់លេខ៨ក្នុងបញ្ជីតម្លៃ២៩លានដុល្លារ (២២,៤ លានផោន) បើទោះបីជារដូវកាល២០១៩-២០២០ មានការខកចិត្តមិនសូវបានបង្ហាញខ្លួនក្រោមការដឹកនាំរបស់លោក Zinedine Zidane និងមានមុខបង្ហាញខ្លួនតែ២ប្រកួតចុងក្រោយរបស់ក្លិបប៉ុណ្ណោះកាលពីរដូវកាលមុន។
ខ្សែប្រយុទ្ធរបស់ក្រុមហង្សក្រហម Liverpool គឺកីឡាករ Salah ឈរនៅលេខ៥នាំមុខកីឡាករខ្សែបម្រើបិសាចក្រហម Manchester United កីឡាករ Pogba នៅលេខ៦ខណៈអ្នកចាំទី De Gea របស់ក្រុមបិសាចក្រហមឈរនៅលេខ១០ ។
ខ្សែប្រយុទ្ធ Antoine Griezmann របស់ក្រុម Barcelona ស្ថិតនៅលេខ៧ ហើយខ្សែប្រយុទ្ធ Robert Lewandowski របស់ក្រុម Bayern Munich ឈរនៅចំណាត់ថ្នាក់លេខ៩ ។
ចំណាត់ថ្នាក់កំពូលទាំងបីស្ថិតក្នុងលំដាប់ដូចគ្នានឹងឆ្នាំ២០១៩ ដែរបើទោះបីជា Mbappe បានកើនឡើង៣លេខ ពីលេខ៧មកឈរលេខ៤ក៏ដោយ។ កីឡាករអាហ្សង់ទីន Messi វ័យ៣៣ឆ្នាំបានព្យាយាមចាកចេញពី Barcelona នៅរដូវក្តៅនេះនិងបានដាក់សំណើផ្ទេរនៅខែសីហា ប៉ុន្តែបានសម្រេចចិត្តស្នាក់នៅ ព្រោះគ្មានក្លិបណាអាចមានលទ្ធភាពទទួលពីតម្លៃខ្លួនរបស់គាត់នៅឡើយ។
ខាងក្រោមនេះគឺជាបញ្ជីឈ្មោះកីឡាករបាល់ទាត់ដែលរកចំណូលបានខ្ពស់បំផុតរបស់ទស្សនាវដ្តី Forbes ប្រចាំឆ្នាំ២០២០៖
1-Lionel Messi (ក្លិប Barcelona សញ្ជាតិអាហ្សង់ទីន) មាន១២៦លានដុល្លារ (៩៧,២លានផោន)
2-Cristiano Ronaldo (ក្លិប Juventus សញ្ជាតិព័រទុយហ្គាល់) មាន១១៧លានដុល្លារ (៩០,៣លានផោន)
3-Neymar (ក្លិប Paris St-Germain សញ្ជាតិប្រេស៊ីល) មាន៩៦លានដុល្លារ (៧៤,១លានផោន)
4-Kylian Mbappe (ក្លិប Paris St-Germain សញ្ជាតិបារាំង) មាន៤២លានដុល្លារ (៣២,៤លានផោន)
5-Mohamed Salah (ក្លិប Liverpool សញ្ជាតិអេហ្ស៊ីប) មាន៣៧លានដុល្លារ (២៨.៥លានផោន)
6-Paul Pogba (ក្លិប Manchester United សញ្ជាតិបារាំង) មាន៣៤លានដុល្លារ (២៦,២លានផោន)
7-Antoine Griezmann (ក្លិប Barcelona សញ្ជាតិបារាំង) មាន៣៣លានដុល្លារ (២៥.៥លានផោន)
8-Gareth Bale (ក្លិប Real Madrid សញ្ជាតិវែល) មាន២៩លានដុល្លារ (២២.៤លានផោន)
9-Robert Lewandowski (ក្លិប Bayern Munich សញ្ជាតិប៉ូឡូញ) មាន២៨លានដុល្លារ (២១,៦លានផោន)
10-David de Gea (ក្លិប Manchester United សញ្ជាតិអេស្ប៉ាញ) មាន២៧លានដុល្លារ (២០.៨លានផោន) ៕
ដោយ៖ភារៈ
