សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ លោក សុខ រស់ អភិបាលរងខេត្តស្វាយរៀងបានអញ្ជើញជាអធិបតីក្នុងកិច្ចប្រជុំពិនិត្យវាយតម្លៃលើការរៀបចំបញ្ជីសារពើភណ្ឌទ្រព្យសម្បត្តិរដ្ឋឆ្នាំគោល(បញ្ជីឆ្នាំ២០១៩)និងជម្រុញការរៀបចំធ្វើប័ណ្ណកម្មសិទ្ធលើអចលនវត្ថុជាទ្រព្យសម្បត្តិរបស់រដ្ឋនាព្រឹកថ្ងៃទី២១ខែកញ្ញានៅសាលប្រជុំមន្ទីរសេដ្ឋកិច្ចនិងហិរញ្ញវត្ថុខេត្តស្វាយរៀងរយៈពេល៥ថ្ងៃចាប់ពីថ្ងៃទី២១រហូតដល់២៥ខែកញ្ញាឆ្នាំ២០២០។
ក្នុងឪកាសនោះលោក ជូ សុធី ប្រធានមន្ទីសេដ្ឋកិច្ចនិងហិរញ្ញវត្ថុខេត្តស្វាយរៀងបានអោយដឹងថាក្នុងការអនុវត្តនាពេលកន្លងមក មន្ទីរសេដ្ឋកិច្ចនិងហិរញ្ញវត្ថុខេត្ត ក្នុងនាមជាសេនាធិការរបស់ក្រសួងសេដ្ឋកិច្ចនិងហិរញ្ញវត្ថុ បានខិតខំពង្រឹងការគ្រប់គ្រង ផ្សព្វផ្សាយនូវលិខិតបទដ្ឋានគតិយុត្ត និងបានធ្វើការផ្សព្វផ្សាយណែនាំជាប្រចាំដល់អាជ្ញាធរកាន់កាប់ និងអង្គភាពប្រើប្រាស់ទ្រព្យសម្បត្តិរដ្ឋ ក្នុងគោលបំណងពង្រឹងការគ្រប់គ្រងទ្រព្យសម្បត្តិរដ្ឋឱ្យកាន់តែមានប្រសិទ្ធភាព តម្លាភាព និងគណនេយ្យភាព ព្រមទាំងរួមចំណែកដល់ការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ និងប្រព័ន្ធព័ត៌មាវិទ្យាគ្រប់គ្រងហិរញ្ញវត្ថុសាធារណៈ។
ចំពោះការគ្រប់គ្រងទ្រព្យសម្បត្តិរដ្ឋ គ្រប់អាជ្ញាធរកាន់កាប់ទ្រព្យសម្បត្តិរដ្ឋ និងអង្គភាពប្រើប្រាស់ទ្រព្យសម្បត្តិរដ្ឋ ត្រូវរៀបចំបញ្ជីសារពើភណ្ឌទ្រព្យសម្បត្តិរដ្ឋ ជាសៀវភៅបញ្ជីសារពើភណ្ឌឆ្នាំគោលរៀងរាល់ ៥ (ប្រាំ)ឆ្នាំម្តង និងក្នុងចន្លោះរយៈពេល ៥ (ប្រាំ)ឆ្នាំ នៃឆ្នាំគោល ត្រូវរៀបចំតារាងកើនឡើងនិងថយចុះនូវទ្រព្យសម្បត្តិរដ្ឋប្រចាំឆ្នាំ។
ក្នុងនេះដែរ មូលដ្ឋានក្នុងការរៀបចំបញ្ជីសារពើភណ្ឌទ្រព្យសម្បត្តិរដ្ឋឆ្នាំគោល(បញ្ជីឆ្នាំ២០១៩)នេះ ត្រូវយកតួលេខក្នុងបញ្ជីសារពើភណ្ឌឆ្នាំគោល(ឆ្នាំ២០១៤) ធ្វើការផ្គូរផ្គង និងផ្ទៀងផ្ទាត់ជាមួយតារាងកើនឡើង និងថយចុះនូវទ្រព្យសម្បត្តិរដ្ឋប្រចាំឆ្នាំ២០១៥ ដល់ឆ្នាំ២០១៨ របស់មន្ទីរ អង្គភាព និងរដ្ឋបាលថ្នាក់ក្រោមជាតិនីមួយៗ និងវាយតម្លៃទ្រព្យសម្បត្តិរដ្ឋឱ្យបានគ្រប់ជ្រុងជ្រោយ ដោយមានប្រតិភូតំណាងក្រសួងសេដ្ឋកិច្ចនិងហិរញ្ញវត្ថុ គណៈកម្មការបញ្ជីសារពើភណ្ឌទ្រព្យសម្បត្តិរដ្ឋប្រចាំក្រសួង ស្ថាប័ន រដ្ឋបាលខេត្ត-ក្រុង-ស្រុក-ឃុំ-សង្កាត់នីមួយៗចូលរួមត្រួតពិនិត្យ ។
ទោះជាយ៉ាងណាក៏ដោយ ក៏យើងពិនិត្យឃើញថា កន្លងមក មន្ទីរ អង្គភាព និងរដ្ឋបាលថ្នាក់ក្រោមជាតិមួយចំនួន ដែលជាអាជ្ញាធរកាន់កាប់ទ្រព្យសម្បត្តិរដ្ឋ និងអង្គភាពប្រើប្រាស់ទ្រព្យសម្បត្តិរដ្ឋ មិនបានបញ្ចប់ការរៀបចំបញ្ជីសារពើភណ្ឌទ្រព្យសម្បត្តិរដ្ឋ ឬតារាងប្រៀបធៀបការកើនឡើង ថយចុះទ្រព្យសម្បត្តិរដ្ឋរបស់អង្គភាពខ្លួនឱ្យបានទាន់ពេលវេលាកំណត់នៅតាមឆ្នាំនីមួយៗឡើយ ហើយម៉្យាងវិញទៀត ក្នុងបញ្ជីសារពើភណ្ឌទ្រព្យសម្បត្តិរដ្ឋដែលបានរៀបចំរួចមួយចំនួន ក៏នៅមានការចុះបញ្ជីសារពើភណ្ឌទ្រព្យសម្បត្តិរដ្ឋស្ទួនគ្នា និងមានតែតួលេខកត់ត្រាក្នុងបញ្ជីសារពើភណ្ឌទ្រព្យសម្បត្តិរដ្ឋ ប៉ុន្តែទ្រព្យសម្បត្តិរដ្ឋជាក់ស្តែងគ្មាន មិនទាន់ធ្វើវិញ្ញាបនបត្រសម្គាល់ម្ចាស់អចលនវត្ថុ និងពុំទាន់បានកំណត់តម្លៃអចលនវត្ថុ-ចលនវត្ថុជាដើម។
លោក សុខ រស់ អភិបាលរងខេត្តស្វាយរៀងក៏បានលើកទឹកចិត្តសមាជិក សមាជិកានៃអង្គពិធីទាំងអស់ឱ្យចូលរួមយ៉ាងសកម្មជាមួយនឹងស្មារតីយកចិត្តទុកដាក់ខ្ពស់ដើម្បីស្វែងយល់ឱ្យបានកាន់តែច្បាស់នូវវិធាន នីតិវិធី និងបច្ចេកទេសនានានៃការធ្វើបញ្ជីសារពើភណ្ឌទ្រព្យសម្បត្តិរដ្ឋឆ្នាំគោល(បញ្ជីឆ្នាំ២០១៩)នេះ ទទួលបានលទ្ធផលល្អប្រសើរ ប្រកបដោយគុណភាពល្អ និងទាន់ពេលវេលា។
ទន្ទឹមនឹងនេះ លោកថ្លែងអំណរគុណដល់អស់លោក លោកស្រីមន្ត្រីតំណាងក្រសួងសេដ្ឋកិច្ចនិងហិរញ្ញវត្ថុ ដែលនឹងផ្ដល់កិច្ចសហការចូលរួមធ្វើបទបង្ហាញក្នុងពិធីនេះ ដើម្បីបញ្ជាក់ឱ្យកាន់តែច្បាស់លាស់អំពីខ្លឹមសារ គោលការណ៍វិធាន និងបច្ចេកទេសនានា សម្រាប់បង្កើនសមត្ថភាពចំណេះដឹងថ្មីបន្ថែមមួយទៀតដល់មន្ត្រី/មន្ទីរ អង្គភាព និងរដ្ឋបាលថ្នាក់ក្រោមជាតិ ដែលមានសមត្ថកិច្ចពាក់ព័ន្ធ យកទៅអនុវត្តន៍ទទួលបានប្រសិទ្ធភាពខ្ពស់។
លោកក៏បានសង្ឃឹមយ៉ាងមុតមាំថា អង្គពិធីនេះ នឹងផ្ដល់ធាតុចូលបន្ថែមយ៉ាងសំខាន់ក្នុងការពង្រឹង និងបង្កើនសមត្ថភាពដល់ថ្នាក់ដឹកនាំ មន្ត្រីជំនាញនៃមន្ទីរ អង្គភាព និងរដ្ឋបាលថ្នាក់ក្រោមជាតិ ក្នុងការចូលរួមចំណែកដើម្បីពង្រឹងការគ្រប់គ្រងទ្រព្យសម្បត្តិរដ្ឋ និងការរៀបចំបញ្ជីសារពើភណ្ឌ ឱ្យកាន់តែមានគុណភាពល្អ ប្រសិទ្ធភាព សង្គតិភាព សុក្រឹតភាព គណនេយ្យភាព និងតម្លាភាព ដើម្បីសម្រេចបាននូវលទ្ធផលល្អប្រសើរ៕
ដោយ៖យឹម សុថាន
