នាយករដ្ឋមន្ត្រីថ្មីជប៉ុននឹងបង្កើនប្រាក់ចំណាយសម្រាប់ការពារជាតិ​

អន្តរជាតិ៖ ក្រសួងការពារជាតិជប៉ុន នឹងលើកសំណើមូលនិធិសម្រាប់ការពារជាតិ​ជាង​៥,៤ពាន់​ ពាន់លានយេន ក្នុងដំណាក់កាលឆ្នាំ​២០២១។ ជាមួយគ្នានោះដែរ នាយករដ្ឋមន្ត្រីជប៉ុន លោក​Yoshihide Suga ​ក៏បានសន្យាថា នឹងបន្តគោលនយោបាយរបស់អតីតនាយករដ្ឋមន្ត្រី អាបេ ក្នុងការពង្រឹង វិស័យការពារជាតិ។
ប្រាក់ចំណាយសម្រាប់ការពារជាតិ របស់ជប៉ុនបានកើនឡើងខ្ពស់ពីមួយឆ្នាំទៅមួយឆ្នាំ ហើយនេះជាឆ្នាំទី​៧ហើយដែលជប៉ុនបង្កើនប្រាក់ចំណាយ ។ ប្រាក់ការពារជាតិ ក្នុងឆ្នាំ​២០២០​មាន ៥,៣១ពាន់ពាន់លានយេន​ ហើយត្រូវបញ្ចប់នៅខែមីនាឆ្នាំ​២០២១។
លោក​ Suga ជាអ្នកឡើងគម្រោងនយោបាយនានា ក្រោមការកាន់អំណាចរបស់នាយករដ្ឋមន្ត្រីអាបេ រយៈពេល​៨ឆ្នាំកន្លងមក។ នៅពេលនេះ លោកបានឡើងកាន់តំណែង​ដឹកនាំវិញម្តង ក្រោយការបោះឆ្នោតជ្រើសរើសពីគណបក្សកាន់អំណាច។ លោកបានប្រកាស សន្យាបន្តនយោបាយរបស់លោកអាបេ គឺពង្រីកនិងពង្រឹងវិស័យការបរទេស និងការពារជាតិឱ្យកាន់តែប្រសើរ។
តាមសារព័ត៌មាន​Japan Times បានផ្សាយថា ក្រសួងការពារជាតិ នឹងស្នើប្រាក់ចំណាយខាងលើនៅចុងខែកញ្ញានេះ ដើម្បីឲ្យសភាពិភាក្សានិងអនុម័ត ។ ជាមួយគ្នានេះក្រសួងការពារជាតិ​មានគម្រោងផ្លាស់ប្តូរយន្តហោះចម្បាំង​ប្រភេទចាស់ៗមួយចំនួន ដោយប្តូរប្រភេទថ្មី ដែលមានបច្ចេកវិទ្យាទំនើបទាន់សម័យ​៕ដោយ៖ធី រីណា