សារព័ត៌មាន នគរវត្ត តែងតែនាំមុខគេជានិច្ច
ក្រុមបិសាចក្រហម Manchester United បានឈានដល់កិច្ចព្រមព្រៀងជាមួយក្លិប Atalanta ដើម្បីចុះហត្ថលេខាលើខ្សែបម្រើស្លាបវ័យ១៨ឆ្នាំ Amad Diallo ។
ក្លិបបនៅ Premier League មួយនេះបានឲ្យដឹងថា យុវជនកូឌឺវ័ររូបនេះនឹងចូលរួមជាមួយក្លិប Manchester United នៅពេលក្រោយដែលត្រូវគោរពតាមល័ក្ខខ័ណ្ឌវេជ្ជសាស្រ្ត ល័ក្ខខ័ណ្ឌផ្ទាល់ខ្លួន និងលិខិតអនុញ្ញាតការងារ ។
នៅក្នុងសេចក្តីថ្លែងការណ៍នៅលើគេហទំព័រផ្លូវការរបស់ក្លិបក៏បានឲ្យដឹងផងដែរថា ពួកគេបានតាមដាន Diallo ចាប់តាំងពីឆ្នាំ២០១៦ នៅពេលដែលគាត់ត្រូវបានគេប្រទះឃើញលេងនៅក្រុមយុវជនអាយុក្រោម១៥ឆ្នាំ។
Diallo បានបង្ហាញទម្រង់លេងចំនួន៣ដងសម្រាប់ក្រុមដំបូងរបស់ក្លិបអុីតាលីកាលពីរដូវកាលមុនដោយរកបានគ្រាប់បាល់ដំបូងរបស់គេក្នុងជំនួបជ័យជម្នះក្នុងលទ្ធផល ៧-១ លើក្រុម Udinese ក្នុងខែតុលា។
ក្លិបបិសាចក្រហមមិនបានបង្ហើបថា តើកិច្ចព្រមព្រៀងនេះមានតម្លៃប៉ុន្មាននោះទេ ប៉ុន្តែរបាយការណ៍បានបង្ហាញថា ប្រហែលស្ថិតនៅក្នុងតំបន់ចំនួន៣៧លានផោន ។
Man United មានពេលវេលាផ្ទេរដ៏មមាញឹកមួយនៅថ្ងៃដែលនាំយក Edinson Cavani ក្នុងការផ្ទេរដោយឥតគិតថ្លៃ និង Alex Telles ពី Porto ខណៈដែល Chris Smalling បានផ្លាស់ប្ដូរជាអចិន្ត្រៃយ៍ទៅលេងនៅក្របខ័ណ្ឌអុីតាលី Serie A ក្នុងក្លិប Roma ៕
ដោយ៖ភារៈ
