សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ មានប្រសាសន៍លើកឡើងក្នុងពិធីចែកកូនត្រី និងកូនកង្កែប ដល់កសិករ បណ្តុំអាជីវកម្មវារីវប្បកម្ម ទូទាំងខេត្តប៉ៃលិន របស់កម្រោង ASPIRE នាថ្ងៃទី០៧ ខែតុលា ឆ្នាំ២០២០ នៅឃុំស្ទឹងត្រង់ ស្រុកសាលាក្រៅ ខេត្តប៉ៃលិន លោក ផាន់ ចាន់ធុល អភិបាលខេត្តប៉ៃលិន បានជម្រុញឱ្យបងប្អូន ប្រជាពលរដ្ឋ ខិតខំចិញ្ចឹមសត្វ និងដាំដំណាំតាមគេហដ្ឋាន ដើម្បីលើកកម្ពស់ជីវភាពគ្រួសារឱ្យបានកាន់តែល្អប្រសើរឡើង ស្របពេលជម្ងឺកូវីត-១៩ កំពុងកើតមានឡើង ដែលជាបញ្ហាចម្បងមួយបណ្តាលឱ្យបងប្អូន ប្រជាពលរដ្ឋ យើង មិនអាចចេញទៅរកស៊ីប្រកបរបរចិញ្ចឹមជីវិត ហើយជួបបញ្ហាខ្វះខាតក្នុងជីវភាពប្រចាំថ្ងៃ។
លោកអភិបាលខេត្តបានមានប្រសាសន៍បន្តថា៖ ដើម្បីសម្រេចគោលដៅលើការចិញ្ចឹមកង្កែប និងត្រីនេះ កសិករផលិតត្រូវមានកិច្ចសហការល្អជាក្រុមបណ្តុំតាមមូលដ្ឋាននីមួយៗ និងរៀបចំផែនការផលិតឱ្យត្រូវតាមរដូវកាល និងតម្រូវការទីផ្សារផងដែរ លើសពីនោះ កសិករយើងត្រូវតែមានឆន្ទៈលើការចិញ្ចឹម និងថែទាំឱ្យបានត្រឹមត្រូវតាមការណែនាំ និងលក្ខណៈបច្ចេកទេស។
លោក ផាន់ ចាន់ធុល ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ត្រូវមានការប្រុងប្រយ័ត្នខ្ពស់ចំពោះសុខភាព ដោយរដូវនេះមានភ្លៀងធ្លាក់ច្រើន ដែលងាយបង្កឱ្យកើតជម្ងឺផ្សេងៗ ជាពិសេសត្រូវមានការប្រុងប្រយ័ត្ន ចំពោះជម្ងឺកូវីដ-១៩ និងត្រូវចូលរួមទប់ស្កាត់ការរីករាលដាល ហើយ បើ មានបញ្ហាអ្វីកើតឡើងក្នុងមូលដ្ឋាន ត្រូវរាយការណ៍ទៅមេឃុំ/ចៅសង្កាត់ ដែលនៅជិតកៀកជាមួយបង ប្អូន ផ្ទាល់ ដើម្បីអោយក្រុមការងារចុះជួយឱ្យបានឆាប់រហ័ស និងទាន់ពេលវេលា។
លោក សាយ សុផាត ប្រធានមន្ទីរកសិកម្ម បានឱ្យដឹងថា៖ គម្រោងASPIRE គឺជាឧបករណ៍មួយ សម្រាប់ចូលរួមចំណែកជាមួយរាជរដ្ឋាភិបាលក្នុងការបណ្តុះបណ្តាល ផ្តល់បច្ចេកទេស ធនធាន ថវិកា សម្ភារៈដល់ពលរដ្ឋទាំងអស់អោយពួកគាត់មានមុខរបរ ការងារ ដើម្បីបង្កើនផលិតផលនានាសំរាប់ផ្គត់ផ្គង់ទីផ្សារនៅតាមតំបន់នានាអោយបានគ្រប់គ្រាន់ទាន់ពេលវេលា និងជាពិសេសដើម្បីផ្សព្វផ្សាយផែនការ យុទ្ធសាស្រ្ត គម្រោង ASPIRE ដែលកំពុងយកចិត្តទុកដាក់ជួយដល់ប្រជាកសិករ តាមរយៈការផ្តល់ពូជត្រី មាន់ កង្កែប និងចំណីផ្សេងៗ ដែលជាទិសដៅសំខាន់សំរាប់ចូលរួមចំណែកបង្កើនការងារមុខរបរ និងជាពិសេសបង្កើននូវសេដ្ឋកិច្ចជាតិអោយមានការរីកចំរើន ស្របតាមគោលនយោបាយរបស់រាជរដ្ឋាភិបាល។
សូមបញ្ជាក់ថា៖ ទូទាំងខេត្តប៉ៃលិនបណ្តុំអាជីវកម្មវារីវប្បកម្មចិញ្ចឹមត្រី/កង្កែប មានចំនួន ១៧បណ្តុំ បានកំពុងដំណើរការផលិត និងមានមេបាពូជ ៣៦គូស្មើនឹង ៧២ក្បាល ព្រមទាំងផលិតបានកូនកង្កែបចំនួន ៣៣,០០០ក្បាល ក្នុងនោះគម្រោង Aspire គ្រួសារកសិករចិញ្ចឹមកង្កែបមានចំនួន ២៨៩គ្រួសារ កង្កែបដាក់ចិញ្ចឹម ៧៥,៨០០កូន ដោយក្នុង ០១គ្រួសារទទួលបានកូនកង្កែបចំនួន ២០០កូន ទៅ១២០០កូន ហើយចំពោះគ្រួសារចិញ្ចឹមត្រីមានចំនួន ១៧៨គ្រួសារ មានកូនត្រីអណ្តែង ត្រីប្រា ត្រីកាប ត្រីទីឡាបព្យា ត្រីឆ្ពិនសរុបចំនួន ១១៨,៨៥០កូន ដោយក្នុង ០១គ្រួសារទទួលបានកូនត្រីចំនួន ២០០កូន ទៅ ១២០០កូន៕ដោយ៖ស សារ៉េត
