សារព័ត៌មាន នគរវត្ត តែងតែនាំមុខគេជានិច្ច
ជប៉ុនបានប្រកាសទៅកាន់អាមេរិកថា ទីក្រុងតូក្យូនឹងមិនអាចចូលរួមក្នុងគម្រោងបោះបង់ក្រុមហ៊ុនហួវៃ តាមអាមេរិកឡើយ ប៉ុន្តែជប៉ុនអាចនឹងចូលរួមប្រសិនបើមានការផ្លាស់ប្តូរសមស្របណាមួយដែលជប៉ុនទទួលបាន។
សារព័ត៌មានYomiuri Shimbun បានផ្សយថា ជប៉ុនបានផ្តល់ព័ត៌មានទៅឲ្យអាមេរិកវិញថាមិនអាចចូលរួមបោះបង់ក្រុមហ៊ុនហួវៃរបស់ចិននោះឡើយ។ រដ្ឋាភិបាលជប៉ុននឹងមានវិធានការទប់ស្កាត់ប្រសិនបើរកឃើញមានករណីគំរាមកំហែងដល់សន្តិសុខជាតិ។
កាលពីខែសីហាកន្លងមក ក្រសួងការបរទេសអាមេរិកបានអំពាវនាវដល់ជប៉ុនឲ្យបោះបង់បច្ចេកវិទ្យា ទូរគមនាគម៍របស់ចិន ពិសេសគឺបច្ចេកវិទ្យាសេវាអត់ខ្សែជំនាន់ទី5G ។
ជាមួយគ្នានោះដែរ កូរ៉េខាងត្បូងបានប្រកាសឲ្យដឹងថា ក្រុមហ៊ុនកូរ៉េខាងត្បូងនៅតែបន្តប្រើប្រាស់បច្ចេកវិទ្យារបស់ហួវៃរបស់ចិនដដែល ។ រដ្ឋាភិបាលកូរ៉េខាងត្បូងបានបញ្ជាក់យ៉ាងច្បាស់ថា នឹងមិនជ្រៀតជ្រែក ចូលកិច្ចការក្រុមហ៊ុនឯកជននោះឡើយ។
កាលពីថ្ងៃទី២៨ខែកក្កដាកន្លងមក រដ្ឋមន្ត្រីការបរទេសកូរ៉េខាងត្បូង លោកស្រីKang Kyung-wha បានប្រកាសថាកូរ៉េខាងត្បូងនៅតែរក្សាសន្តិសុខរបស់ខ្លួនបានល្អ ក្នុងវិស័យបច្ចេកវិទ្យា។
មិនថាជប៉ុនឬកូរ៉េខាងត្បូងនោះឡើយ ប្រទេសជាច្រើននៅក្នុងតំបន់អឺរ៉ុប ក៏នៅតែបន្តប្រើប្រាស់បច្ចេកវិទ្យារបស់ក្រុមហ៊ុនហួវៃ ដដែល មិនអាចអនុវត្តតាមអាមេរិក បោះបង់ក្រុមហ៊ុនហួវៃ បានឡើយ៕ដោយ៖ធី រីណា
