សារព័ត៌មាន នគរវត្ត តែងតែនាំមុខគេជានិច្ច
កងពលលេខ៧ នៃកម្លាំងទាហានជើងទឹកអាមេរិក បានបញ្ជាក់ថា នាវាចម្បាំង នាវាផ្ទុកយន្តហោះបានចូលរួមធ្វើសមយុទ្ធរួម ជាមួយ ទាហានជើងទឹកជប៉ុន និង អូស្ត្រាលីនៅសមុទ្រចិនខាងត្បូង ចាប់ពីថ្ងៃទី១៩ខែតុលា។
នៅក្នុងសេចក្តីប្រកាសនាថ្ងៃទី២០ខែតុលា កងពលលេខ៧នៃកម្លាំងទាហានជើងទឹកអាមេរិក ដែលមាននាវា USS John S. McCain និង នាវាចម្បាំង Arleigh Burke បំពាក់មីស៊ីលឆ្លងទ្វីប នាំផ្លូវ ក្នុងសកម្មភាពធ្វើសមយុទ្ធ។
ចំណែកម្លាំងទាហានការពារជប៉ុន (JMSDF) បានបញ្ជូននាវាចម្បាំងប្រភេទMurasame JS Kirisame ទៅចូលរួម ។ ដោយឡែកប្រទេសអូស្ត្រាលីវិញ បានបញ្ជូននាវាចម្បាំងAnzac HMAS Arunta ទៅចូលរួមក្នុងសកម្មភាពធ្វើសមយុទ្ធទាហានជើងទឹកត្រីភាគី ។
នេះមិនមែនជាការធ្វើសមយុទ្ធលើកទីមួយនោះឡើយ សមយុទ្ធលើកនេះគឺជាលើកទី៥ហើយ រវាងប្រទេសទាំងបី។ គោលដៅនៃការធ្វើសមយុទ្ធត្រីភាគីដើម្បីរក្សាការទំនាក់ទំនងសម្ព័ន្ធមិត្តក្នុងការធានាដល់សេរីភាពចរាចរណ៍នៅដែនសមុទ្រ។
បន្ទាប់ពីការធ្វើសមយុទ្ធត្រីភាគី នៅសមុទ្រចិនខាងត្បូង កម្លាំងទាហានជើងទឹកប្រទេសទាំងបី នឹងបន្តចូលរួមធ្វើសមយុទ្ធ ចតុភាគី ដោយមានកម្លាំងទាហានជើងទឹកឥណ្ឌាចូលរួមផងដែរ។
សមយុទ្ធចតុភាគីមានឈ្មោះថា Malabar 2020 នឹងធ្វើឡើងនៅឈូងសមុទ្រBengal និងសមុទ្រអារ៉ាប់ដោយមានកម្លាំងទាហានជើងទឹកប្រទេសទាំង៤ចូលរួម៕ដោយ៖ធី រីណា
