សារព័ត៌មាន នគរវត្ត តែងតែនាំមុខគេជានិច្ច
យ៉ាងហោចណាស់ក៏មានមនុស្ស២នាក់ស្លាប់និង៥នាក់រងរបួសធ្ងន់ ពីការវាយប្រាហារដោយកាំបិតបង្កឡើងដោយបុរសម្នាក់តែងខ្លួនជាខ្មោចក្នុងរាត្រី Halloween នាយប់ថ្ងៃទី៣១ខែតុលាក្នុងទីក្រុងកេបិច ប្រទេសកាណាដា។
តាមការលើកឡើងរបស់កម្លាំងប៉ូលិសកាណាដាឱ្យដឹងថា ជនដៃដល់ជាយុវជនមានអាយុ២០ឆ្នាំស្លៀកឈុតបុរាណ កាន់អាវុធ វាយប្រហារពលរដ្ឋជាច្រើននាក់។ ការវាយប្រហារកើតឡើងនៅជិតទីតាំងរដ្ឋក្នុងទីក្រុងកេបិច ។ ប៉ូលិសក៏បានស្នើដល់ពលរដ្ឋរស់នៅតំបន់ កើតហេតុត្រូវស្នាក់នៅក្នុងផ្ទះដើម្បីបញ្ចៀសហេតុការណ៍អាក្រក់កើតឡើង។
បង្ហោះលើបណ្តាញសង្គមទ្វីតធើរ នាព្រឹកថ្ងៃទី១ខែវិច្ឆិកា ស្នងការប៉ូលិសទីក្រុងកេបិចបានឲ្យដឹងថាបានចាប់ខ្លួនជនសង្ស័យមួយចំនួន ដើម្បីបំពេញតាមការស្រាវជ្រាវ។
មន្ត្រីក្នុងទីក្រុងកេបិចបានចាត់ទុកថាជាសកម្មភាពអាក្រក់បំផុតមិនអាចលើកលែងឲ្យឡើយ ។ ជាមួយគ្នានេះដែរមន្ត្រីក្នុងក្រុងបានស្នើពលរដ្ឋរូបណាដែលដឹងពីហេតុការណ៍ខាងលើ សូមទូរស័ព្ទទៅកាន់ស្នាក់ការប៉ូលិសតាមលេខ៩១១ ដើម្បី ផ្តល់ព័ត៌មានសម្រាប់បន្តការស្រាវជ្រាវចាប់ខ្លួនជនដៃដល់៕ ធី រីណា
