សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អ្នកដែលមានស្នាដៃដ៏ឆ្នើមដែលបានបន្សល់ទុករហូតមកដល់សព្វថ្ងៃនេះច្រើនណាស់ ជាការណ៍ពិតប្រសិនបើយើងងាកត្រឡប់បកក្រោយវិញបន្តិច ក្នុងអំឡុងទសវត្សរ៍៨០ គ្រានោះប្រទេសកម្ពុជាយើង មិនទាន់មានការជ្រាបចូលនូវបច្ចេកវិទ្យាជឿនលឿនដូចពេលបច្ចុប្បន្ននេះទេ ហើយគេសង្កេតឃើញថា រាល់រូបភាពក៏ដូចជាផ្ទាំងផ្សព្វផ្សាយទាំងអស់ដែលគេប្រើប្រាស់ក្នុងការផ្សព្វផ្សាយខ្សែភាពយន្តថ្មីៗនៅតាមរោងកុននានាជាច្រើនក្នុងរាជធានីភ្នំពេញភាគច្រើនគឺសុទ្ធសឹងតែត្រូវបានគូរឡើងដោយដៃផ្ទាល់របស់ជាងគំនូរ ដែលត្រូវបានគេស្គាល់ថាជាងគំនូរវត្តភ្នំ។ក៏ប៉ុន្តែក្នុងពេលបច្ចុប្បន្ននេះ ដោយសារតែមានការវិវត្តនៃសម្ភារនិងបច្ចេកវិទ្យាទំនើបៗជាច្រើន ដែលកាន់តែបង្ក ឲ្យមានភាពងាយស្រួលនោះគេក៏លែងនិយមនូវការគូររូបដោយដៃតទៅទៀត តែប្រែមកជាការគូររូបបែបលក្ខណៈឌីជីថលវិញ។ ដូច្នេះហើយបានជាគំនូរដែលគូរដោយដៃ ដូចកាលពីសម័យមុនមិនសូវជាលេចវត្តមាននៅតាមរោងកុនទំនើបៗក៏ដូចជាតាមផ្ទាំងផ្សព្វផ្សាយនានានៅតាមទីសាធារណៈ តទៅទៀតនោះទេ។ដោយហេតុតែក្តីស្រលាញ់ និងទេពកោសល្យខាងផ្នែកគូរគំនូរក៏ដូចជាការសរសេរអក្សរឆ្លាក់នេះ តាំងតែពីតូចៗមកទើបអ្នកដែលគាំទ្រនូវស្នាដៃរបស់លោកតាកែវ សាន់ ភាគច្រើនស្គាល់លោកតាតាមរយៈរហស្សនាមថាជាងគំនូរវត្តភ្នំ ហើយរូបគាត់នៅតែបន្តអាជីពមួយនេះរហូតមកដល់ពេលបច្ចុប្បន្ននេះ។ បើទោះបីជាពេលបច្ចុប្បន្ននេះ លោកមានវ័យ៨៣ឆ្នាំទៅហើយយ៉ាងណាក្តីក៏លោកតាមិនបោះបង់អាជីពដែលលោកតាស្រលាញ់តាំងពីក្មេងមួយនេះចោលដែរ។
គួរបញ្ជាក់ផងដែរថាលោកតា កែវ សាន់ ប្រកបរបរនេះតាំងពីអំឡុងជំនាន់ឆ្នាំ១៩៨០ រហូតដល់ឆ្នាំ១៩៩៣ ដោយក្នុងអំឡុងពេលនោះគឺលោកតាតែងតែត្រូវបានគេហៅឲ្យទៅគូរគំនូរផ្សព្វផ្សាយពាណិជ្ជកម្មនៅតាមរោងកុនល្បីៗជាច្រើន មានដូចជារោងកុនហាវ៉ៃ រោងកុនកាពីតូល រោងកុនលុច្ស រោងកុនបាយ័ន រោងកុនវិមានសួស្តី រោងកុនមេគង្គ រោងកុនអង្គរ រោងកុនភ្នំពេជ្រ រោងកុនសូរិយា និងរោងកុនជាច្រើនទៀតក្នុងរាជធានីភ្នំពេញ នាសម័យនោះផងដែរ។ក៏ប៉ុន្តែក្រោយមក ក្នុងអំឡុងឆ្នាំ១៩៩៣ លោកតាក៏បានឈប់ពីអាជីពគូរគំនូរនៅតាមរោងកុននេះ ក៏ព្រោះតែក្នុងពេលនោះ រោងកុនភាគច្រើនត្រូវបានឈប់ដំណើរការតទៅទៀត ដូច្នេះហើយទើបបានជា លោកតាងាកមកបើកហាង និងដំឡើងស្លាកយីហោផ្ទាល់ខ្លួនវិញ។ នៅអំឡុងឆ្នាំ២០០៤ ទៅ២០០៥ ដោយសារតែមានវត្តមានកុំព្យូរទ័រនិងសម្ភារទំនើបៗជាច្រើនលេចឡើងជាហូរហែនៅ ក្នុងប្រទេសកម្ពុជា ដែលនាំឲ្យការគាំទ្រនូវគំនូរ ដែលគូរដោយផ្ទាល់ដៃនេះក៏ចាប់ផ្តើមមានការធ្លាក់ចុះ។ ដោយមើលឃើញថាទីផ្សារមិនអំណោយផល ដូច្នេះហើយក្នុងពេលនោះលោកតា ក៏បានសម្រេចចិត្តបិទទ្វារហាងតែម្តង។ ផ្អាកបានមួយរយៈក្នុងឆ្នាំ២០១៦លោកតា កែវ សាន់ ក៏បានវិលត្រឡប់មកកាន់អាជីពនេះឡើងវិញដោយ ក្នុងពេលនោះលោកតាបានដាក់តុតូចមួយនៅខាងក្រៅនៃផ្សារធំថ្មីដែលមុខរបរនេះក៏បានជាប់រហូតមកទល់នឹងពេលបច្ចុប្បន្ននេះ។ បើទោះបិីលោកតាបានឃ្លាតឆ្ងាយពីអាជីពនេះជិត១៥ឆ្នាំទៅក៏ពិតមែន តែនៅពេលដែលវិលត្រឡប់មកវិញ ទឹកដៃនៃការគូររូបនិងអក្សររបស់លោកតានៅតែទាក់ទាញនិងគួរឲ្យចាប់អារម្មណ៍ដូចមុនដដែល។ ជាមួយគ្នានេះដែរលោកតា ក៏បានលើកឡើងផងដែរថាបច្ចុប្បន្ននេះវ័យរបស់លោកក៏កាន់តែទៅមុខ ហើយអ្វីដែលសោកស្តាយនោះគឺលោកមិនចង់ឲ្យបាត់បង់នូវចំណេះនិងជំនាញដែលលោកតាមាននៅពេលនេះទៅដោយទទេៗនោះឡើយ។ ដូច្នេះហើយទើបវិចិត្រកររូបនេះបានសំណូមពរដល់អ្នកដែលមានចំណាប់អារម្មណ៍លើជំនាញនេះអាចមកទាក់ទងរៀនពីរូបលោកបាន ហើយលោកតាក៏នឹងទទួលបង្រៀនដោយឥតគិតថ្លៃផងដែរ៕ដោយ ស សម
ដោយ៖ស សម
