សារព័ត៌មាន នគរវត្ត តែងតែនាំមុខគេជានិច្ច
ក្រុមខ្លាំងមកពីអេស្ប៉ាញ Barcelona បានបំបាក់ក្រុមម្ចាស់ផ្ទះមកពីក្រិច Dynamo Kyiv ក្នុងលទ្ធផល៤ទល់០ សម្រាប់ការប្រកួតក្របខ័ណ្ឌ Champion League វគ្គជម្រុះតាមពូល បើទោះបីការប្រកួតកាលពីរាត្រី២៤ឈានចូលថ្ងៃទី២៥ វិច្ឆិកានេះគ្មានខ្សែប្រយុទ្ធឆ្នើម Messiក៏ដោយ។
៤គ្រាប់ដែលក្រុមភ្ញៀវ Barcelona រកបានគឺនៅក្នុងការប្រកួតតង់ទី២ ដោយតង់ទី១មិនមានគ្រាប់បាល់កើតឡើងនោះទេ គ្រាប់ទី១រកបានដោយកីឡាករ Dest នៅនាទីទី៥២ គ្រាប់ទី២ និងទី៣ រកបានដោយកីឡាករ Braithwaite នៅនាទីទី៥៧ និងនាទីទី៧០(បាល់ពិន័យប៉េណាល់ទី) និងគ្រាប់ចុងក្រោយរកបានដោយខ្សែប្រយុទ្ធសញ្ជាតិបារាំង Griezmannនៅម៉ោងបន្ថែមនាទីទី៩០+២ជិតចប់ការប្រកួតទៅហើយ។
ចំណែកក្រុមខ្លាំងមកពីអុីតាលី Juventus បានយកឈ្នះក្រុមភ្ញៀវ Ferencvaros ដោយលទ្ធផល២ទល់១ ដែលខ្សែប្រយុទ្ធឆ្នើមសញ្ជាតិព័រទុយហ្គាល់ Cristiano Ronaldo រកបាន១គ្រាប់ដែរជួយឲ្យមានជ័យជម្នះនេះ។ នៅតង់ទី១ កីឡាករ Uzuni របស់ក្រុម Ferencvaros ជាអ្នករកគ្រាប់បាល់នាំមុខមុន ប៉ុន្តែនៅនាទីទី៣៥ ខ្សែប្រយុទ្ធ Cristiano Ronaldoរកបាន១គ្រាប់សងវិញ ហើយនៅនាទីទី៩០+២ជិតចប់ការប្រកួតទៅហើយកីឡាករ Morata របស់ Juventus រកបាន១គ្រាប់ទៀត ធ្វើឲ្យក្រុមនេះទទួលបានជ័យជម្នះលើក្រុមភ្ញៀវ២ទល់១តែម្តង។
លទ្ធផលខាងលើនេះធ្វើឲ្យក្រុមអ្នកមានបុណ្យ Barcelona កក់កៅអីឡើងវគ្គ១៦ក្រុមដោយស្វ័យប្រវត្តិ ទោះបីសល់២ប្រកួតទៀតក្នុងវគ្គជម្រុះតាមពូលក៏ដោយ ដោយក្រុមនេះឈរលេខ១ក្នុងពូលG មាន១២ពីន្ទុ ខណៈដែលក្រុម Juventus ឈរលេខ២ក្នុងពូលមាន៩ពិន្ទុ។
ក្រៅពីលទ្ធផលខាងលើនេះ ការប្រកួតកាលពីរាត្រីថ្ងៃទី២៤ក៏មានគូខ្លាំងៗមួយចំនួនទទួលបានលទ្ធផលល្អផងដែរដោយក្រុម Sevilla យកឈ្នះក្រុមភ្ញៀវ Krasnodar ២ទល់១, ក្រុមតោខៀវ Chelsea យកឈ្នះក្រុមម្ចាស់ផ្ទះ Rennes ២ទល់១, ក្រុម Lazio យកឈ្នះក្រុមភ្ញៀវ Zenit ៣ទល់១ និងក្រុមម្ចាស់ផ្ទះ Borussia Dortmund យកឈ្នះក្រុមភ្ញៀវ Club Brugge៣ទល់០ ៕
ដោយ៖ភារៈ
