សារព័ត៌មាន នគរវត្ត តែងតែនាំមុខគេជានិច្ច
ពលរដ្ឋដែលរស់នៅចម្ងាយពីរោងចក្រចម្រាញ់ប្រេងដល់ទៅ២៥ គីឡូម៉ែត្រ ក៏ឮសូរសំឡេងផ្ទុះយ៉ាងខ្លាំងដែរ។ មកទល់ពេលនេះមិនទាន់មានព័ត៌មានស្តីពីអ្នកស្លាប់ឬរងរបួសក្នុងហេតុការណ៍ផ្ទុះនោះនៅឡើយទេ ។ កម្លាំងប៉ូលិស ក្រុមពន្លត់អគ្គិភ័យ និងរថយន្តជួយសង្គ្រោះជាច្រើនបានទៅដល់កន្លែងកើតហេតុភ្លាមៗ។
ប៉ូលិសអាហ្វ្រិកខាងត្បូងបានឲ្យដឹងថា ហេតុការណ៍ផ្ទុះរោងចក្រចម្រាញ់ប្រេងនេះកើតឡើងនៅព្រឹកថ្ងៃទី៤ ខែធ្នូ ហើយសំឡេងផ្ទុះខ្លាំងធ្វើឲ្យកក្រើករោងចក្ររបស់ក្រុមហ៊ុនEngen ស្ថិតនៅក្នុងទីក្រុង Durban ប្រទេសអាហ្វ្រិកខាងត្បូង។
ក្រុមហ៊ុន Engenបានប្រកាសថារោងចក្រដែលផ្ទុះនោះអាចចម្រាញ់ប្រេងឆៅបានដល់ទៅ១២០ពាន់បារ៉ែលក្នុងមួយថ្ងៃ។ ក្រុមហ៊ុនខាងលើ ជារបស់ក្រុមហ៊ុនPetronas ប្រទេសម៉ាឡេស៊ី។
អាហ្វ្រិកខាងត្បូង មានរោងចក្រចម្រាញ់ប្រេងចំនួន៦ក្នុងនោះមាន៤រោងចក្រចម្រាញ់ប្រេងឆៅ និង២រោងចក្រចម្រាញ់ប្រេងចម្រុះ។
កាលពីដើមឆ្នាំ២០២០ រោងចក្រចម្រាញ់ប្រេងAstron Energy ដែលជារោងចក្រធំលំដាប់ទី៣នៅអាហ្វ្រិកខាងត្បូងក៏បានផ្ទុះឆេះ ហើយរោងចក្រនោះអាចចម្រាញ់ប្រេងបានដល់ទៅ១សែនបារ៉ែលក្នុងមួយថ្ងៃ៕ដោយ៖ធី រីណា
