រដ្ឋមន្ត្រីក្រសួងយុត្តិធម៌អាមេរិកលាលែងចេញពីតំណែង

ចែករំលែក៖

រដ្ឋមន្ត្រីក្រសួងយុត្តិធម៌អាមេរិកលោក William Barr បានប្រកាសលាលែងចេញពីតំណែង ដោយសារតែមានវិវាទជាមួយប្រធានាធិបតីដូណាល់ ត្រាំ ពេលដែលលោកប្រកាសថា ការបោះឆ្នោតអាមេរិកមិនមានការបន្លំនោះឡើយ។
រដ្ឋមន្ត្រីក្រសួងយុត្តិធម៌កាលពីថ្ងៃទី១៤ខែធ្នូបានប្រកាសថា លោកនឹងលាលែងចេញពីតំណែងនៅសប្តាហ៍ក្រោយ។
ពាក់ព័ន្ធនឹងការលាលែងចេញពីតំណែងរបស់រដ្ឋមន្ត្រីក្រសួងយុត្តិធម៌នេះ ប្រធានាធិបតីដូណាល់ ត្រាំបានបង្ហោះលើបណ្តាញសង្គម ថា «ខ្ញុំទើបតែជួបប្រជុំជាមួយលោកBill Barr នៅសេតវិមាន ហើយទំនាក់ទំនងយើងទាំងពីរមានសភាពល្អប្រសើរ ហើយលោក Bill Barr បានបំពេញការងារយ៉ាងល្អ។

លោក Bill Barr នឹងឈប់សម្រាកជួបជាមួយគ្រួសារក្នុងឱកាសបុណ្យគ្រិឹសស្មាស់ខាងមុខ។
ជាមួយគ្នានេះលោកត្រាំ ក៏បាន ជ្រើសរើសលោកJeff Rosen រដ្ឋលេខាធិការក្រសួងយុត្តិធម៌កាន់តំណែងជំនួសវិញ។
នៅក្នុងលិខិតលាលែងចេញពីតំណែងលោកBill Barr ក៏បាន សរសើរដល់ប្រធានាធិបតីដូណាល់ ត្រាំ ដែលបានជំរុញសេដ្ឋកិច្ចជាតិ ពង្រឹងកម្លាំងយោធា និងទប់ស្កាត់ការឆ្លងកូវីដ-១៩ បានយ៉ាងល្អបំផុតផងដែរ។
ការលាលែងចេញពីតំណែង ក្រោយពេលប្រធានាធិបតី ដូណាល់ ត្រាំ ខឹងសម្បាយ៉ាងខ្លាំងដែលរដ្ឋមន្ត្រីយុត្តិធម៌ប្រកាសថា ការបោះឆ្នោតប្រកបដោយយុត្តិធម៌ ។ លោកBill Barr ត្រូវបានជ្រើសរើសធ្វើជារដ្ឋមន្ត្រីក្រសួងយុត្តិធម៌នៅចុងឆ្នាំ២០១៨ ជំនួសលោកJeff Sessions ដែលលាលែងចេញពីតំណែង ៕

ដោយ៖ធី រីណា