សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី៤ខែមករាឆ្នាំ២០២១ កូវីដ-១៩ទម្រង់ថ្មី ត្រូវបានរកឃើញនៅក្នុងប្រទេសអាហ្វ្រិកខាងត្បូង។ រដ្ឋមន្ត្រីក្រសួងសុខាភិបាលអង់គ្លេស លោក Matt Hancock បានបញ្ជាក់ថា កូវីដ-១៩ទម្រង់ថ្មី ដែលទើបតែរកឃើញក្នុងប្រទេសអាហ្វ្រិកគឺគ្រោះថ្នាក់ជាងកូវីដ-១៩ដែលបានរកឃើញក្នុងប្រទេសអង់គ្លេសទៅទៀត។
កូវីដ-១៩ទម្រង់ថ្មីគឺឆ្លងរាលដាលយ៉ាងលឿនបំផុត។
លោក Matt Hancock មានប្រសាសន៍ទៅកាន់សារព័ត៌មាន BBC ថា «ខ្ញុំពិតជាបារម្ភយ៉ាងខ្លាំងពីកូវីដ-១៩ទម្រង់ថ្មី (កូវីដ-១៩បម្រែបម្រួលខ្លួនថ្មី) នៅក្នុងប្រទេសអាហ្វ្រិកខាងត្បូង។ ទាំងនោះហើយបានជាយើងកាត់បន្ថយការហោះហើរទៅកាន់អាហ្វ្រិកខាងត្បូង…នេះជាបញ្ហាបារម្ភបំផុត គឺបារម្ភជាងនៅក្នុងប្រទេសអង់គ្លេសទៅទៀត»។
លោក Matt Hancock បន្តទៀតថា ក្រុមអ្នកវិទ្យាសាស្ត្រមិនមានជំនឿថាវ៉ាក់សាំងប្រឆាំងកូវីដ-១៩បច្ចុប្បន្ននឹងមានប្រសិទ្ធភាពដល់កូវីដ-១៩ទម្រង់ថ្មីនៅអាហ្វ្រិកខាងត្បូងនោះឡើយ។ ជាមួយគ្នានេះវ៉ាក់សាំងប្រឆាំងកូវីដ-១៩ របស់ក្រុមហ៊ុន AstraZeneca និងមហាវិទ្យាល័យOxford គឺជាប្រភេទវ៉ាក់សាំងដែលមានសក្កានុពលបំផុតក្នុងវិស័យវេជ្ជសាស្ត្រដើម្បីទប់ស្កាត់ការឆ្លងរាលដាលកូវីដ-១៩។
រដ្ឋមន្ត្រីក្រសួងសុខាភិបាលMatt Hancock នៅថ្ងៃទី៤ខែមករាបានប្រកាសថា អង់គ្លេសបានចាប់ផ្តើមចាក់វ៉ាក់សាំងប្រឆាំងកូវីដ-១៩ របស់ក្រុមហ៊ុនAstraZeneca/Oxfordហើយ ។
គិតត្រឹមម៉ោង ៧យប់ថ្ងៃទី៤ខែមករាឆ្នាំ២០២១ តាមគេហទំព័រ Worldometer បានផ្សាយថានៅទូទាំងពិភពលោកមានករណីឆ្លងកូវីដ-១៩ដល់ទៅជាង៨៥,៥លាននាក់ហើយ និងស្លាប់ជាង១,៨៥លាននាក់។ ជាមួយគ្នានោះក៏មានអ្នកជំងឺជាង៦០,៥លាននាក់ព្យាបាលជាសះស្បើយដែរ។ ប្រទេសអង់គ្លេសស្ថិតនៅលំដាប់ទី៦លើពិភពលោក ដោយមានអ្នកឆ្លងជាង២,៦លាននាក់ និងស្លាប់៧៥ពាន់នាក់៕
ដោយ៖ធី រីណា(រូបភាព៖AFP)
