សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបើករថយន្តបែនដឹកដីហើយបានដាច់ហ្វ្រ័ងជ្រុលទៅបុករះម៉ូតូ រថយន្តនិងផ្ទះប្រជាពលរដ្ឋពេញទំហឹង បណ្តាលឱ្យរងការខូតខាតយ៉ាងដំណំ និងធ្វេីឲ្យមានការកកស្ទះចរាចរណ៍ជាខ្លាំងកាលពីវេលាម៉ោង១ និង១០នាទីរសៀល ថ្ងៃទី៥ ខែមករា ឆ្នាំ២០២១ ស្ថិតនៅច្រកចូលវត្តសន្សំកុសល ក្នុងសង្កាត់បឹងទំពុនទី១ ខណ្ឌមានជ័យ រាជធានីភ្នំពេញ។
បេីតាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញបុរសម្នាក់បើករថយន្តបែនដឹកដីមួយគ្រឿង ពណ៌ក្រហម ពាក់ស្លាកលេខ ភ្នំពេញ 3D-7419 តាមបណ្តោយផ្លូវលេខ២៧១ ក្នុងទិសដៅពីជើងទៅត្បូង ខណៈមកដល់ត្រង់ចំណុចខ្លោងទ្វារវត្តសន្សំកុសល ក៏បត់ស្តាំចូលតាមបណ្តោយផ្លូវបេតុង ស្រាប់តែមកដល់ចំណុចកើតហេតុខាងលើសង្ស័យថារថយន្តបែនដឹកដីនោះដាច់ហ្វ្រ័ងបានជ្រុលទៅបុករះម៉ូតូនិងរថយន្តដែលគេចតទុកនៅខាងមុខផ្ទះយ៉ាងពេញទំហឹង រួចរថយន្តមិនទាន់អស់ល្បឿនក៏បន្តជ្រុលទៅបុកទូធ្វើសោចូលផ្ទះមួយតង់ទៀត បណ្តាលឱ្យម៉ូតូមួយគ្រឿងម៉ាក PCX ពណ៌ស ពាក់ស្លាកលេខ ភ្នំពេញ 1IA-6730 រងការខូចខាតយ៉ាងដំណំ។ រីឯរថយន្តម៉ាក KIAមួយគ្រឿងទៀតរងការខូចខាតបែកស្តុបក្រោយខាងស្តាំ។ ចំណែកឯស្លាកយីហោផ្ទះវិញក៏រងការខូចខាតផងដែរ តែសំណាងល្អ ក្នុងករណីគ្រោះថ្នាក់ចរាចរណ៍នេះ មិនបង្កឱ្យមាននរណាម្នាក់រងបួសនោះទេ។
ក្រោយពេលកើតហេតុ សមត្ថកិច្ចមូលដ្ឋានសហការជាមួយសមត្ថកិច្ចជំនាញបានចុះមកដល់ហើយធ្វើការវាស់វែង និងសម្រួលចរាចរណ៍កុំឱ្យមានការកកស្ទះ រួចឱ្យភាគីតៃកុងរថយន្តបង្កសម្របសម្រួលគ្នាជាមួយភាគីជនរងគ្រោះ ដោយតៃកុងរថយន្តបង្កព្រមសងសំណងនិងជួសជុលឱ្យវិញទៅខាងភាគីជនរងគ្រោះទាំងអស់ដើម្បីបញ្ចប់រឿងនៅនឹងកន្លែងតែម្តង៕
ដោយ៖ ភារ៉ា ដង្កោ
