សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យជាឃាតក បាញ់សម្លាប់នាយរងការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ ដែលសមត្ថកិច្ចកំពុងតាមប្រមាញ់នៅខេត្តស្ទឹងត្រែង និងខេត្តរតនគិរីនោះ តាមពិតគឺជាបុគ្គលម្នាក់ដ៏សាហាវបំផុត ធ្លាប់ប្រព្រឹត្តបទឧក្រិដ្ឋ កន្លងទៅ និងធ្លាប់ជាប់ពន្ធនាគារ ទើបជនសង្ស័យរូបនេះមិនចោលសារជាតិរបស់ខ្លួន បន្តប្រព្រឹត្តបទឧក្រិដ្ឋដដែល។
សូមរំលឹកថា ជនសង្ស័យជាឃាតករូបនេះមានឈ្មោះ អ៊ា ណារ៉េន ហៅ រិន ផាន់ អាយុ៣៨ឆ្នាំ អតីតទាហានកុម្ម៉ង់ដូ ស្នាក់នៅផ្ទះលេខ ៥៨ អ៉ឺ១ ផ្លូវលេខ១១០ ភូមិ១៦ សង្កាត់ផ្សារកណ្ដាល១ ខណ្ឌ ដូនពេញ ។
នៅដេីមឆ្នាំ២០០៣ ឈ្មោះ អ៊ា ណារ៉េន និងបក្សពួកធ្លាប់ធ្វើសកម្មភាពប្លន់បាញ់សម្លាប់លោក ឱម រដ្ឋសាឌី ទីប្រឹក្សាសម្ដេចក្រុមព្រះ ប្លន់យកទូរស័ព្ទដៃណូគា ៩២០០ នៅចំណុចជិតផ្សារកាប់គោ សង្កាត់ទន្លេបាសាក់ ខណ្ឌចំការមន។
ក្រោយធ្វើសកម្មភាពប្លន់បាញ់សម្លាប់លោក ឱម រដ្ឋសាឌី កម្លាំងជំនាញ ការិយាល័យប្រឆាំងភេរវកម្ម នៃស្នងការដ្ឋាននគរបាលរាជធានី បានស្រាវជ្រាវចាប់ឃាត់ខ្លួន អ៊ា ណារ៉េន និង បក្សពួក ឈ្មោះផាត បញ្ជូនទៅតុលាការរាជធានីភ្នំពេញ ។ តុលាការរាជធានីបានផ្ដន្ទាទោសដាក់ពន្ធនាគារ ។
នៅឆ្នាំ ២០១៨ ឈ្មោះ អ៊ា ណារ៉េន បានចេញពីពន្ធនាគារ ។
នៅយប់ថ្ងៃទី ៣០ ខែ ធ្នូ ឆ្នាំ ២០២០ ឈ្មោះ អ៊ា ណារ៉េន បានបាញ់សម្លាប់នាយរងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ក្នុងហេតុការណ៍គ្រោះថ្នាក់ចរាចរណ៍នៅមុខព្រលានយន្តហោះអន្តរជាតិភ្នំពេញ ។ ប្រភពមួយបានបញ្ជាក់ថា មូលហេតុដែលនាំឱ្យ អ៊ា ណារ៉េន បាញ់សម្លាប់នាយរងការិយាល័យនគរបាលព្រហ្មទណ្ឌកម្រិតស្រាល ព្រោះតែពេលមានគ្រោះថ្នាក់ចរាចរណ៍ ជនរងគ្រោះបានជេរប្រមាថដោយពាក្យអសុរោះជាច្រើនទៅលេីអ្នក
បេីកបររថយន្ដឡិចសុីសRX300 ដែលធ្វើឲ្យ អ៊ា ណារ៉េន ខឹងក៏បាញ់សម្លាប់តែម្ដង ។ ( ករណីអ្នកលេង ប៉ះអ្នកមែន ហេីយអ្នកមែនជាមុខសញ្ញាចាស់ថែមទៀត )។
បច្ចុប្បន្នជនសង្ស័យខាងលើ កំពុងលាក់ខ្លួននៅក្នុងព្រៃគេចពីការប្រមាញ់ឡោមព័ទ្ធរបស់សមត្ថកិច្ច ហើយក៏ត្រូវប្រយ័ត្នផងដែរ ចំពោះប្រតិបត្តិការចុះបង្ក្រាប ខណៈជននេះមានកាំភ្លើងនៅជាប់តាមខ្លួន អាចនឹងបាញ់តដៃណាមួយជាមួយសមត្ថកិច្ច។
ទោះជាយ៉ាងណាក៏ដោយសមត្ថកិច្ចបានសហការគ្នាចម្រុះស្ថាប័ន បំពេញការងារដោយការប្រុងប្រយ័ត្ន គ្រប់វិធីសាស្រ្តដើម្បីចាប់ឃាត់ជនសង្ស័យខាងលើនេះ យកមកធ្វើការផ្ដន្ទាទោសទៅតាមផ្លូវច្បាប់៕
ដោយ៖វណ្ណៈ
