សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ រថយន្ដដឹកឈើមួយគ្រឿង បើកបរធ្វេសប្រហែស ធ្វើឱ្យធ្លាក់កំណាត់ឈើលើផ្លូវហើយជាអកុសល ស្របពេលនោះមានបុរសម្នាក់កំពុងជិះម៉ូតូមកដល់ចាប់ហ្រ្វាំងមិនទាន់ ក៏បានបុកដុំឈើដួល ហើយមានរថយន្តមកពីក្រោយបុកស្លាប់ភ្លាមៗ រួចគេចខ្លួនបាត់។
ហេតុការណ៍នេះកើតឡើងកាលពីរសៀលថ្ងៃទី០៨ ខែ មករា ឆ្នាំ២០២១ នៅលើកំណាត់ផ្លូវជាតិលេខ៥ ក្នុងភូមិតាសី ឃុំតាម៉ឺន ស្រុកថ្មគោល ខេត្តបាត់ដំបង ។
មន្រ្តីនគរបាលស្រុកថ្មគោលបានឲ្យដឹងថាមុនពេលកើតហេតុ មានរមានរថយន្តមួយគ្រឿងដែលមានដឹកដុំឈើជាច្រើនដុំនៅលើរថយន្ត បានបើបានបើកបរក្នុងទិសដៅពីជើងទៅត្បូង។ លុះបើកមកដល់កន្លែងកើតហេតុស្រាប់តែធ្លាក់កំណាត់ឈើមួយដុំធំលើផ្លូវ ។ស្របពេលនោះដែរ ជនរងគ្រោះម្នាក់ជិះម៉ាកហុងដាឌ្រីមសេ១២៥ ពណ៌ខ្មៅ ស៊េរី២០១៥ បើកមកដល់ចាប់ហ្រ្វាំងមិនទាន់បានកិនឈើនោះ បណ្តាលឱ្យដួលនៅកណ្តាលផ្លូវ។គាប់ជួនពេលនោះ មានរថយន្តមួយគ្រឿងទៀតបើកមកពីក្រោយមកដល់ កិនបន្ថែមទៅលើអ្នកបើកបរម៉ូតូ បណ្ដាលឱ្យស្លាប់នៅកន្លែងកើតហេតុតែម្តង ។
ប្រភពដដែលបានឲ្យដឹងទៀតថាជនរងគ្រោះមានឈ្មោះ ឆុន រីឆាត អាយុ១៥ឆ្នាំ រស់នៅភូមិនិគមក្រៅ ឃុំជ្រោយស្តៅ ស្រុកថ្មគោល។ ក្រោយពេលកើតហេតុរថយន្តបង្កបុកមនុស្សស្លាប់ បានបើកគេចខ្លួនបាត់ស្រមោល។ដោយឡែកសពជនរងគ្រោះ ត្រូវបានសមត្ថកិច្ចប្រគល់ទៅឱ្យក្រុមគ្រួសារ យកទៅធ្វើបុណ្យតាមប្រពៃណី៕ដោយ៖ប្រាថ្នា
