សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ទីបំផុត! ស្ត្រីជនរងគ្រោះចំនួន១២នាក់ ដែលជាទាករផ្លូវភេទទាហានជួរមុខរបស់ជប៉ុន ក្នុងអំឡុងពេលសង្គ្រាមលោកលើកទី២ ត្រូវបានតុលាការកូរ៉េខាងត្បូង នៅថ្ងៃទី៨ ខែមករា បានបញ្ជាឲ្យជប៉ុនផ្ដល់សំណងជាប្រាក់១០០លានវ៉ុន (៩១៣០០ដុល្លារអាមេរិក)។ ហេីយនេះគឺជាជ័យជម្នះផ្នែកច្បាប់ជាលើកដំបូងសម្រាប់កូរ៉េខាងត្បូង ដែលប្រឆាំងនឹងរដ្ឋាភិបាលជប៉ុនពាក់ព័ន្ធរឿងទាសករផ្លូវភេទ ប៉ុន្តែករណីមួយនេះវាអាចធ្វើឲ្យមានការខូចខាតកាន់តែខ្លាំងសម្រាប់ប្រទេសជិតខាងទាំងពីរនេះ ក្នុងការទំនាក់ទំនងគ្នា។
ជាក់ស្តែងតុលាការមួយក្នុងក្រុងសេអ៊ូល បានបញ្ជាឲ្យទីក្រុងតូក្យូត្រៀមលុយដើម្បីសងជំងឺចិត្តដល់ស្ត្រីជនរងគ្រោះដោយការបៀតបៀនផ្លូវភេទចំនួន១២នាក់ ដោយម្នាក់ៗត្រូវទទួលបានលុយ១០០លានវ៉ុន ដែលស្មើនឹង៩១៣០០ដុល្លារ។ បន្ទាប់ពីពួកគេ ត្រូវបានបង្ខំចេញឆ្ងាយពីគ្រួសារ ហើយឲ្យធ្វើការនៅក្នុងផ្ទះបន របស់ទាហានជួរមុខជប៉ុនក្នុងសម័យសង្គ្រាមលោកលើកទី២។
បេីតាមសាលក្រមរបស់តុលាការកូរ៉េខាងត្បូងក្នុងសវនាការថ្ងៃទី៨ ខែមករាម្សិលមិញនេះ ដោយសំដៅជប៉ុនជាដើមបណ្ដឹង បានបញ្ជាក់ថា៖«ភស្តុតាងសម្ភារដែលពាក់ព័ន្ធ និងសក្សី បានបង្ហាញថា ជនរងគ្រោះបានរងទុក្ខលំបាកយ៉ាងខ្លាំង ទាំងបញ្ហាស្មារតីដែលមិនអាចនឹកស្មានដល់ និងស្លាកស្នាមនៃរបួសរាងកាយដែលនៅមានដោយសារទង្វើខុសច្បាប់របស់ជនជាប់ចោទ។មកទល់ពេលនេះ មិនទាន់មានសំណងណាមួយត្រូវផ្ដល់ឲ្យពួកគេសម្រាប់ការរងទុក្ខដែរ»។
ដោយឡែកទីភ្នាក់ងារពត៌មាន Yonhap បានចុះផ្សាយថា ជនរងគ្រោះបានដាក់ពាក្យបណ្តឹង សុំឲ្យមានការដោះស្រាយវិវាទតាំងពីខែសីហាឆ្នាំ២០១៣មកម្ល៉េះ។ ក្នុងបណ្ដឹងនោះ ពួកគេ អះអាងថា បានចាញ់បោក ឬបង្ខំឲ្យធ្វើទាសករផ្លូវភេទ ដូច្នេះហើយពួកគេទាមទារប្រាក់សំណង១០០លានវ៉ុនឲ្យជនរងគ្រោះម្នាក់ៗសម្រាប់ការឈឺចាប់របស់ពួកគេ។ ប៉ុន្តែនាពេលបច្ចុប្បន្ន បេីគិតត្រឹមឆ្នាំ២០២១នេះ ដើមបណ្តឹង៥នាក់ប៉ុណ្ណោះ នៅរស់រានមានជីវិតក្នុងចំណោម១២នាក់។
ចំណែកទីភ្នាក់ងារព័ត៌មាន Kyodo ក៏បានចុះផ្សាយដែរថា មន្ត្រីជប៉ុនបានបង្ហាញការសោកស្ដាយចំពោះរឿងនេះ ពិសេសការដែលកូរ៉េខាងត្បូងមិនគិតគូរគោលការណ៍អធិបតេយ្យជាតិក្នុងការសម្រេចចិត្តរបស់ខ្លួន។ ចំណែកអ្នកនាំពាក្យរដ្ឋាភិបាលជប៉ុនវិញ អះអាងថា ជប៉ុនមិនប្ដឹងជំទាស់ឡើយ។ ការលើកឡើងបែបនេះក្រោយការប្រកាសសាលក្រម ក្រសួងការបរទេសជប៉ុនកោះហៅអគ្គរដ្ឋទូតកូរ៉េខាងត្បូងប្រចាំតូក្យូទៅសួរនាំ។
គួរបញ្ជាក់ដែរថា ទីក្រុងតូក្យូ ក៏ធ្លាប់បានអះអាងថា ករណីនេះគួរតែត្រូវបានលើកលែង ផ្អែកលើអភ័យឯកសិទ្ធិអធិបតេយ្យភាព ដែលជាគោលការណ៍ស្របច្បាប់អនុញ្ញាតឲ្យរដ្ឋមួយ អាចរួចផុតពីបណ្តឹងរដ្ឋប្បវេណីនៅក្នុងតុលាការអន្តរជាតិ។ ប៉ុន្តែ ជនរងគ្រោះ បានប្រកែកថាច្បាប់នេះមិនគួរត្រូវបានយកមកអនុវត្តចំពោះឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាមនោះទេ៕
ដោយ៖ស តារា
(រូបភាព៖AFP)
